Rusiye Federal migratsion hızmetiniñ (FMH) hadimleri oktâbrniñ 11-nde saba Qarasuvbazardaki şahsiy evde tintüv keçirip, «gizli migrantlarnı» qıdırğan eken. Bu aqta «Qırım birdemligi» cemaat birleşmesi bildire.
Olarnıñ malümatına köre, tintüv Ali Kuroşnıñ evinde yapıldı. O, «Vad» şirketiniñ işçilerine binanı kirağa bere. Kuroşnıñ aytqanına köre, Rusiye FMH hadimleri «vesiqalarnı teşkerdi».
«İşbu tedbirler Lugansk, Donetsk, Ermenistan ve Azerbaycandan kelgen qanunsız migrantlarnı tapmaq içün keçirildi, 50-ge yaqın insan tutuldı. Qırım Cumhuriyetinde bulunğanlarınıñ qanunğa uyması ve iş izniniñ bar olması teşkerilecektir», – dep aytıla haberde.
Haber etile ki, FMH hadimleri Ali Kuroşnıñ bir de bir bozuvını qayd etmedi.
Bu malümatnı Qırım.Aqiqatqa qırımtatar milliy areketiniñ faali Zair Smedlâyev isbatladı.
Rusiye uquq qoruyıcılarınıñ izaatları yoq.
Oktâbrniñ 11-nde saba qırımtatar milliy areketiniñ faalleri Qarasuvbazarda keçirilgen tintüv aqqında bildirdi.
Qırım ilhaqından soñ yarımadada rusiyeli akimiyet mustaqil jurnalistler, cemaat ve qırımtatar milliy areketiniñ faalleri, Meclis azaları ve «Hizb ut-Tahrir» ile alâqası olğanında şeklengen musulmanlarnıñ evlerinde sıq-sıq tintüvler keçirmege başladı.
