Cumaertesi künü saba saat 6:30 Aqyarda raketa atışına oşağan küçlü bir ses eşitildi, dep haber ete Qırım.Aqiqat muhbiri.
Bundan soñ, patlav eşitildi ve pencerelerniñ camları titredi. Mühbir, ava mudafaası sisteması işke tüşürildi, dep tahmin ete.
Aynı zamanda Aqyarnıñ rusiyeli başı Mihail Razvojayev şeerde olğan patlav RF arbiyleriniñ talimleri ile bağlı olğanını iddia ete.
Şeerde ava telükesi ilân etilmedi.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Daa bir patlav 2023 senesi iyülniñ 17-nde oldı. Avgustnıñ 12-nde Rusiye akimiyeti Keriç köprüne yapılğan daa eki ücüm aqqında bildirdi. Yarımadada yüksek (sarı) terror telükesi seviyesi devam ete. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
