Ukraina prezidentiniñ Qırım Muhtar Cumhuriyetindeki daimiy vekiliniñ sabıq muavini İzet Gdanovnıñ fikirince, işğal etilgen Qırımnıñ memuriy sıñırında Herson vilâyeti tarafından vaqtınca qoyulğan inşaatlar tam bir sıñır qurucılığına oşay.
«Mına böyle muvaqqat inşaatlar… şimdi bir şeyni aytıp, başqasını yapqan vaqıtları – aytmağa qorqalar. Asılında sıñır qurula!», – dep yazdı Gdanov Facebook saifesinde.
Herson vilâyetiniñ memuriy sıñırında «Kalançak» ve «Çonğar» kiriş-çıqış kontrol noqtalarını donatuv işleri devam ete. Donatuv leyhası eki basamaqtan ibaret. Birinciden, noyabrniñ 15-ne qadar rejim alanlarını qurmağa, soñra servis merkezleri, avtovokzallar ve memuriy hızmet kösterüv merkezlerini donatmağa planlaştırıla. Leyha fiyatı 170 million ğrıvnâ olaraq esaplanğan edi, eki qısmı dekabrniñ 20-ne qadar kerçekleştirilmeli.
2014 senesiniñ başında Qırım Rusiye tarafından ilhaq etilgen soñ Ukrainanıñ qıtadaki qısmı ile yarımada arasında şeklen memuriy, lâkin kerçekte aqiqiy olğan sıñır keçti. Herson vilâyetinde Qırım ile memuriy sıñırda üç kiriş/çıqış kontrol noqtası çalışa – «Kalançak», «Çonğar» ve «Çaplınka».
