Taşkent şeer mahkemesi sabıq Özbekistan prezidentiniñ qızı Gülnara Karimova davasınıñ tahqiqatını bitirdi. O, 13 yıl ve 4 ay apiste qalmasına üküm etildi, dep bildire Özbekistan Yuqarı mahkemesi, dep haber ete «Nastoyaşçeye Vremâ».
Ceza çeküv müddeti 2015 senesi avgustnıñ 21-nden sayılacaq.
Yanvarniñ 8-nde Özbekistan Yuqarı mahkemesiniñ matbuat hızmeti, Taşkentte Karimovanıñ davası boyunca yañı mahkeme esnası başlandı, o, qapalı şekilde keçirile, dep tasdıqladı. Bu esnasnıñ başlanğanını Karimovanıñ İsviçre advokatı Greguar Manja ve Gülnaranıñ qızı İman daa sentâbrniñ 16-nda bildirgen ediler.
Bu sefer Karimova ve bir qaç diger insan «cinaiy birleşme erkânında para talap etüv, bücet sermiyasını hırsızlav ve çetel memleketlerinde cinaiy kârnı qanuniyleştirüvnen bağlı cinayet yapqanında» qabaatlana.
2017 senesi, İslam Karimovnıñ vefatından soñ, onıñ üyken qızı Gülnara Karimova Özbekistanda 10 yılğa azatlıqtan marum etildi. Onı bergi tölemegeninde, hırsızlıqta ve para talap etkeninde, em de ofşor şirketleriniñ vesiqalarını yoq etkeninde qabaatladılar.
- Özbekistanda prezident qızına qarşı davalar ABD ve bir qaç Avropa memleketinde bunıñ kibi qabarcılıq davalarınıñ iştirakçisi olğan soñ açıldı. Tahqiqat malümatına köre, Karimova, Özbekistanda cep telefonı bağı litsenziyasını bermek şartınen telekommunikatsion ve diger şirketlerden (esasen çetel şirketleri: MTS, «Vımpelkom», ING, Telia Sonera) $1 mlrd qabar aldı. Daa soñra o ve yaqınları bu paranı çetelge ofşor şirketleri üzerinden çıqarıp, dünyanıñ çeşit köşelerinde ondan çoq villa ve diger mal-mülk satın aldı.
- Berilgen paranıñ bir qısmı – tahminen $555 mln – İsviçre esaplarında tapıldı. Daa $200 mln – diger memleketlerniñ esaplarında. Al-azırda Özbekistan akimiyeti bu paranı memleketke qaytarmağa tırışa.
- Birinci ükümden soñ Karimova ev apsinde yaşadı, amma 2019 senesi mart ayında onı nezaret altında tutuv şartlarını bozğanında qabaatlap, Taşkent vilâyetiniñ koloniyasına yolladılar. Karimova ve qızı apis şartlarını bozmadı, dep bildirgen ediler. Tezden oña qarşı ekinci cinaiy dava açıldı.
- 2017 senesi dekabr ayında ABD Maliye nazirligi Karimovanı «Magnitskiy qanunı» boyunca sanktsion cedvelge kirsetti. Maliye nazirliginiñ malümatına köre, Karimova «devlet subyektlerini biznesni çekip almağa, bazarlarnı inhisarlaştırmağa, qabar almağa celp etken ve para talap etken küçlü cinayet birleşmesini idare etti».
