Gürcistannıñ sabıq prezidenti, Odessa vilâyeti devlet memuriyetiniñ sabıq reisi Miheil Saakaşkili aprelniñ 1-nde Ukrainağa qayta bilecegini bildirdi. Bu aqta o, jurnalist Dmitriy Gordonnıñ «V gostâh u Gordona» yayınında ayttı.
«Bu sene aprelniñ 1-ne elektron biletim bar. Varşavadan Kyivge ketem, saat 14:05-te Borıspilde olmağa planlaştıram. Bu biletni aldım, çünki eminim ki, Poroşenko ekinci turğa keçmez ve bundan soñ iç bir sıñırcı Poroşenkonıñ meni Ukrainağa almamağa emrini ve diger bir sıra cinaiy emrini yerine ketirmeycek», – dedi Saakaşvili.
Aprelniñ 1-i – Ukrainada martnıñ 31-nde olacaq prezident saylavlarınıñ birinci turından soñ ertesi künü.
Al-azırda Ukraina Devlet sıñır hızmetiniñ 2018 senesi fevralniñ 15-nde çıqqan Gürcistannıñ sabıq prezidenti, Odessa vilâyeti devlet memuriyetiniñ sabıq reisi Miheil Saakaşviliniñ Ukrainağa kirişini üç yılğa yasaq etmek qararı bar.
İşbu yasaqnıñ lâğu etilüvi aqqında bir malümat yoq edi.
2017 senesi iyül ayınıñ soñunda Ukraina prezidenti Petro Poroşenko Miheil Saakaşviliniñ Ukraina vatandaşlığını toqtatqan buyruqnı imzaladı. Saakaşvili Ukraina vatandaşlığını alğanda yañlış malümat bergen eken. 2017 senesi sentâbrniñ 10-nda Saakaşvili sıñır kontrolinden keçmeyip, Ukrainağa kirdi.
2018 senesi fevralniñ 12-nde Miheil Saakaşvili Kyiv merkezindeki restoranlardan birinde yaqalandı, soñra Ukraina devlet sıñır hızmeti ve devlet migratsion hızmeti onı Poloniyağa qaytardılar, dep bildirgenler. 2017 senesi sentâbr ayında o, «andan kelip, Ukraina qanunlarını bozğan edi». Poloniyadan Saakaşvili Felemenkke ketti. Ukraina mahkemeleri Saakaşvili açtırğan bir qaç davanı baqmaqta.
