Advokat Ayder Azamatov müvekkili Ernes Ametovnı Rostov-na-Donu SİZOsında ziyaret etti. İmayeci Aleksey Ladin ise Server Zekiryayevni ziyaret etti.
«Qırım birdemligi» cemaat birleşmesi bildirgenine köre, koronavirus hastalığı pandemiyası sebebinden Bağçasaraydaki «Hizb ut-Tahrir davasınıñ» diger mabüslerini ziyaret etip olamadılar.
«Ernes bir qarar. Elbette, pandemiya pek qasevetlendire. Apiske alınmazdan evel on eki parmaq içek problemleri bar edi. Süt mallarını aşaması kerek: qatıq, süt ve digerleri. Faqat SİZOğa bu mallarnı belli olmağan sebeplerden bermeyler», – dep tarif etti Azamatov.
İmayeciniñ aytqanına köre, Ernes Ametov esnasqa azırlanmağa devam ete ve qabaatsız olğanını mahkemede qorçalamağa niyetlene. Apis cezasını siyasiy ve diniy sebeplerden taqip dep saya.
Advokat Ladinniñ bildirgenine köre, Zekiryayevniñ «boyun ahlat tüyümleri yanğısı bar edi, amma diagnozı qoyulmadı».
«İmaye tarafı Zekiryayevniñ tibbiy tedqiqi yapılsın dep, bir qaç kere ariza yazğan edi. Ultrases talili yapıldı, Ukraina konsulı bu mesele sebebinden ziyaret etken edi», – dep bildirdi Ladin.
Server Zekiryayev onı ekim çağırıp, şimdi koronavirus yuqunçına oğrav telükesi bar olğanından bir qoşma tedqiq yapılmaycaq, dep bildirdi.
Martnıñ 19-nda İstinaf arbiy mahkemesi Bağçasaraydaki ekinci «Hizb ut-Tahrir davasınıñ» yedi mabüsini apiste qaldırdı. Sekizinci mabüs Server Mustafayevniñ oturışuvı sağlıq vaziyetinden başqa vaqıtqa qaldırıldı.
2017 senesi oktâbr ayında Rusiye telükesizlik hısmetiniñ hadimleri Bağçasaraynıñ altı sakini Timur İbragimov, Marlen Asanov, Memet Belâlov, Seyran Saliyev, Server Zekiryayev ve Ernes Ametovnı tutup alan edi. FSB olarnı Rusiyede ve onıñ tarafından ilhaq etilgen Qırımda yasaqlanğan «Hizb ut-Tahrir» teşkilâtınıñ azaları olğanında qabaatlay.
«Qırım birdemligi» cemaat teşebbüsiniñ koordinatorı Server Mustafayev ve qırımtatarı, musulman Edem Smailov 2018 senesi mayısnıñ 21-nde Qırımda Rusiye uquq qoruyıcıları tarafından tutulğan edi. Olarnıñ davası Bağçasaraydaki «Hizb ut-Tahrir davasına» ilâve etildi.
2019 senesi noyabrniñ 15-nde Rusiyeniñ Rostov-na-Donu Cenübiy okrugınıñ arbiy mahkemesi Bağçasaraydaki ekinci «Hizb ut-Tahrir davasınıñ» temelini baqıp başladı.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
