Qırımnıñ Rusiye ükümetiniñ Fevqulâde vaziyetler nazirligi yarımadada avgustnıñ 12-nde ve avgustnıñ 13-nde olacaq furtunalı ava aqqında tenbiley.
Qurtarıcılar qırımlı sinoptiklerniñ malümatına esaslana.
«Qırımda suvuq frontal bölüv keçkeninden Qırımda künniñ ekinci yarısında ve avgustnıñ 12-nde kün soñuna qadar, avgustnıñ 13-nde kün devamında bazı yerlerde küçlü sağanaq, boranlı yağmur, burçaq yağması, saniyede 20-25 metr süratınen yel esmesi beklenile», – dep aytıla müessise haberinde.
Qayd etilgenine köre, bu vaziyette fevqulâde vaziyet ihtimali yüksek, elektrik naqil ve bağ hatları zarar köre, yaramay qoyulğan büyük ve reklama inşaları yıqıla bile.
Tünevin berilgen malümatqa köre, avgustnıñ 12-14-nde Qırımda fevqulâde yanğın telükesi qalacaq. Şimdi yarımadada hususiy yanğınğa qarşı rejim çalışa.
