Aqmescitte yaramay ava olması tahmin etile, furtuna havfı ilân etildi. Bu aqta Qırımnıñ Rusiye Fevqulâde vaziyetler nazirliginiñ matbuat hızmeti bildirdi.
«Qırımnıñ gidrometeorologiya ve tabiat monitoringi» Federal devlet bücet müessisesiniñ malümatına köre, iyünniñ 5-nde saba Aqmescitte küçlü yağmur yağması, bora, burçaq, saniyede 20-25 metr süratlı yel esmesi beklenile», – dep bildirdi Kreml kontrolindeki Qırımnıñ fevqulâde vaziyetler naziri Sergey Şahov.
Kelgen yaramay ava sebebinden qurtarıcılar yarımada sakinleri ve musafirlerini binadan ve şeerge çıqmaqtan vazgeçmege çağıra. Bu imkânsız olsa, yerastı keçitlerge kirmemege, reklama levhaları, büyük terek ve elektrik ağlarınıñ yanında turmamağa tevsiye etile. Qurtarıcılar aydavcılarnı maşinalarnı terek altında ve levhalar tübünde qaldırmamağa çağıra.
Fevqulâde vaziyetler nazirligi bütün Qırımda furtuna havfını ilân etti. Sinoptiklerniñ tahminlerine köre, iyünniñ 4-nde ve 5-nde yarımadada boranlı yağmur ve ruzgâr beklenile.
