2023 senesiniñ başından berli dünyada 45 jurnalist vazifelerini eda etkende elâk olğan. Bu 2002 senesinden berli eñ alçaq köstergiçtir, dep yazıla "Sıñırsız mühbirler" uquq qoruyıcı teşkilâtınıñ er yıllıq maruzasında.
Jurnalistlerniñ eñ çoq sayısı (23 kişi) bu sene arbiy çatışmalar zonasında elâk oldı. Olardan 17 kişi Gazze, İsrail ve Livanda öldürildi. Ukrayinada cenkniñ eki yılı devamında 11 jurnalist elâk oldı, olardan ekisi - 2023 senesi.
Soñki 20 yıl içinde eñ çoq jurnalist 2012 ve 2013 seneleri öldürildi - 144 ve 143 kişi. Bu vaqıt Suriye ve İraqta eñ şiddetli arbiy areketler yüz bere edi. 2022 senesi 61 jurnalist öldürildi.
Maruzanıñ müellifleri qayd etkenine köre, şimdi 521 jurnalist faaliyetleri içün apiste yata. Eñ çoq mabüsler Qıtayda (121), Myanmada (68) ve Belarusta (39) buluna. Rusiyede, "Sıñırsız mühbirler" teşkilâtınıñ esaplarına köre, SİZO ve koloniyalarda 28 jurnalist buluna.
2024 senesiniñ başında bütün dünyada 84 jurnalist ğayıp sayıla.
Halqara jurnalistler federatsiyası bildirdi ki, AB ve ABD tarafından terroristik olaraq tanılğan "Hamas" taqımı oktâbrniñ 7-nde İsrailge ücüm etken soñ, cenkni aydınlatqan 68 jurnalist öldürildi. Umumen, teşkilâtnıñ malümatına köre, 2023 senesi 94 jurnalist öldürildi ve aman-aman 400 kişi apiske alındı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
