Ukrayina tış işler naziri Andriy Sıbiğa, oraq ayınıñ 10-na keçken gecesi Rusiyeniñ Ukrayinağa yapqan soñki darbesini izaatladı.
“Kıyivde pek qorqunçlı gece edi, uçucısız uçaqlar ve raketalar, şu cümleden ballistik raketalarnen ücüm etildi”, — dedi bildirid o.
Nazir paytahtta mesken binalar zarar kördi, elâk olğan ve yaralanğan vatandaşlar bar dep bildirdi.
Sıbiğanıñ aytqanına köre, Rusiye prezidenti diplomatiya ve barışıq ıntıluvlarını red etip, “terror ve arbiy cinayetlerni” üstün köre.
“Men ortaqlarımnı em ABD Senatınıñ qanun leyhasına, em de Avropa Birliginiñ 18-inci sanktsiyalar paketine nisbeten acele sürette qarar almağa çağıram. Rusiyeniñ Ukrayinadaki insanlarnı qorquzğanını közetmek yeter endi. Rusiye arbiy maşnasınıñ maliye etilmesini toqtatmaq içün şimdi areket etiñiz”, — dep qayd etti o.
Rusiye oraq ayınıñ 10-na keçken gecesi Ukrayina regionlarına uçucısız uçaq ve raketalarnen ücüm etti. Hususan, Kıyivde eki elâk olğan ve 16 yaralanğan kişi aqqında belli.
Rusiye arbiyleri çeşit silâ qullanıp, Ukrayina regionlarına muntazam sürette ücüm ete.
Rusiye akimiyeti, Rusiye ordusı Ukrayinanıñ şeer ve köyleriniñ grajdan infrastrukturasına, vatandaş ealisini öldürgenine, hastahaneler, mektepler, bala bağçaları, energetika ve suv teminlevi obyektlerini yoq etkenine red ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri dep tanıy ve olarnıñ maqsatlı olğanını qayd ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
