Ukrayina tış işler naziri Andriy Sıbiğa, Ukrayinağa qarşı cenk vaqtında Ğarp Rusiye yapqanlarını bağışlay bile, dep aytqan slovak zenaatdaşı Yuray Blannarnıñ beyanatına cevap berdi.
"Yuray, Rusiyeniñ cezasızlıq duyğusı onıñ cinayetleriniñ esas sebebidir. Cinayetçi ceza yerine bağışlansa, onıñ areketlerini toqtatmağa ümüt etmek saflıqtır. Rusiye siziñ diger yanağıñızğa da urar. Bu cenkte kimseni ğayıp etmegenlerniñ böyle beyanatlarnı bildirmege aqqı yoq", — dep yazdı Sıbiğa Х içtimaiy ağında.
Bir kün evel STVR kanalınıñ efirinde Blanar, Ğarp cenkni toqtatmaq içün Rusiyenen qonuşmağa tırışmaq, ve "belki de, olğan er şeyni bağışlamaq kerek", dep bildirdi.
Keçken afta Slovakiya Rusiyege qarşı sanktsiyalarnıñ 18-inci paketini tasdıqlamadı. Bratislava Avropa Birliginiñ Rusiye gazı ve cermayından bütünley vazgeçmek planlarını tenqit ete. Rusiye energiyasına bağlı memleket Brükselden Slovakiyadaki energiya buhranını toqtatmaq içün bir çare talap ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
