Ukrayina tış işler naziri Andriy Sıbiğa, Amerika Birleşken Devletleri ve üç Avropa memleketinden zenaatdaşlarınen bir sıra muzakereler keçirdi — bunı o, noyabrniñ 29-nda bildirdi.
Hususan, Ukrayina TİN başı devlet kâtibi Entoni Blinken ile subetinden esabat berdi, oña Rusiyeniñ Ukrayina energetik sisteması ve atom obyektlerine ücümleriniñ aqibetleri aqqında aytıp berdi.
"Ukrayinanıñ mudafaa qabiliyetlerini, ava qalqanını ve energetik dayanıqlığını quvetleştirüv yollarını muzakere ettik", — dep bildirdi Sıbiğa.
Daa soñra, ukrayin naziri bulğar zenaatdaşı İvan Kondov ile eki taraflı işbirlikniñ quvetleştirilüvi aqqında subetini bildirdi.
Bundan da ğayrı, o, Norveç Tış işler naziri Espen Bart Eyde ve Yunanistan baş diplomatı Georgos Gerapetritis ile subet keçirip, olarnen Rusiye ücümleriniñ aqibetlerini ve Ukraiynağa qol tutuvnı muzakere etti.
Sıbiğanıñ aytqanına köre, Kondov, Eyde ve Gerapetritis ile subetlerde taraflar "müim vaqialar arfesinde" fikirler paylaştılar.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
