"Sıñırsız mühbirler" teşkilâtı BMT-niñ altı mahsus maruzacısına muracaat etip, 2022 senesi hırsızlanğan ve azatlıqtan marum etilgen Qırımlı vatandaş jurnalisti İrına Danılovıçnı acele azat etmege çağırdı. Bu aqta malümat olarnıñ resmiy saytında bar.
Muracaat Human rights first Amerika aq qoruyıcı teşkilâtınen beraber azırlandı ve Qırımlı aq qoruyıcısı ve jurnalistniñ sağlıq vaziyeti fenalaşqanınen bağlı.
Teşkilâtnıñ malümatına köre, İrına Danılovıçnıñ sağlıq vaziyeti fenalaşa, aq qorçalayıcılar BMT mahsus maruzacılarını haberdar etmege qarar aldılar, olarğa İrına Danılovıçnıñ apiste tutulması ve sağlıq vaziyeti aqqında soñki malümatnı berdi. Olar, işkence, söz serbestligi, qadınlarğa qarşı zorbalıq, mahkeme mustaqilligi, aq qorçalayıcılarnıñ qorçalavı ve terrorizm ile küreş meselelerinde mustaqil ekspertler olalar.
"Sıñırsız mühbirler" ve HRF öz muracaatında BMT mahsus maruzacılarını acele sürette onıñ işinen oğraşıp barmağa ve vaziyetini ögrenmege çağırdılar.
Hatırlatamız ki, Sabannıñ 31-nde vatandaş jurnalisti İrına Danılovıçnıñ qız qardaşı Qırım.Aqiqatqa FSİN hadimleri "İrınanı maqsatlı olaraq ölüdürecek olalar", dep bildirdi. Daa evel İrına Danılovıçnıñ özü, apiske alınğan qadınlarğa, parlaq yarıqlar ve yüksek sesli muzıka ile işkence kibi, izsiz işkence qullanılğanını bildirgen edi. Koloniyada bu arizalardan soñ teşkerüv keçirildi, bir de bir bozuv tapılmadı.
2022 senesi Qırımlı jurnalist ve aq qorçalayıcı İrına Danılovıçnı FSB hadimleri qaçırdı. Daa soñra onı patlayıcı maddeler saqlağanında qabaatladılar, tahqiqat izolâtorında ise otit hastalığı sebebinden tibbiy yardım kösterilmedi. Neticede faalniñ bir qulağı eşitmey ve tedaviylenmey.
2024 senesi Armanda, koloniyağa kelgen soñ, Danılovıç qulaq ve baş ağrıları sebebinden tibbiy bölükke muracaat etti, amma cevap olaraq ekim Lidiya Morozova Danılovıç sağırlaşqan soñ, ağrı özü keçecegini bildirdi.