«Sıñırsız mühbirler» halqara teşkilâtı «Meduza» mühbiri İvan Golunovnıñ azat etilüvinen tebriklep, Rusiyede ve işğal etilgen Qırımda eñ azından altı jurnalist uydurılğan davalar boyunca apiste qala, dep hatırlata.
Azatlıq Radiosınıñ bildirgenine köre, olarnıñ arasında «Grani.ru» qırımlı jurnalisti Remzi Bekirov bar. O, Rusiyede ve ilhaqı altındaki yarımadada yasaqlanğan «Hizb ut-Tahrir» teşkilâtınıñ faaliyetinde iştirak etkeninde qabaatlana. Teşkilât «Tvoya gazeta» Aluşta neşiriniñ muarriri Aleksey Nazimovnıñ davası aqqında da hatırlattı. Onı «Yedinaya Rossiyadan» para talap etkeninde qabaatlap, 4 yıl ve 7 ay koloniyada qalmasına üküm ettiler.
«Sıñırsız mühbirler» «Novıye kolesa» Rusiye neşiriniñ baş muarriri İgor Rudnikov, «Ukrinform» agentliginiñ mühbiri Roman Suşçenko, «Upolnomoçen zayavit» gazetasınıñ neşircisi ve rostovlı jurnalisti Aleksandr Tolmaçev, «BlogSoçi» saytınıñ temelcisi Aleksandr Valovnı da azat etmege çağıra. Bu jurnalistler Rusiye apishanelerinde tutula.
Bu sene aprel ayında «Sıñırsız mühbirler» dünyada söz serbestliginiñ bozuluvına dair maruzanı derc etti. Rusiye 180 yerden 149-ıncı yer aldı ve matbuat serbestliginiñ vaziyeti qıyın olğan memleketler sırasına kirdi. Aq qorçalayıcılar Rusiyede sebepsiz tintüv ve apis cezaları bar, mustaqil kütleviy haber vastaları ve internetke basqı yapıla, dep bildire.
«Sıñırsız mühbirler» – merkezi Parijde olğan halqara ükümetten tış teşkilâttır. Söz serbestliginiñ dünya reytingini teşkilât 2002 senesinden itibaren er yıl tize.
