Terror ücümini azırlağanında ve patlayıcı maddelerni qanunsız yapqanında qabaatlanıp, Rusiye SİZOsında tutulğan Ukraina tarafdarı faal Oleg Prıhodko sıçavullar olğan kamerağa qapatqanlar. Bu aqta advokatı Nazim Şeyhmambetov Qırım.Aqiqatqa ayttı.
«Prıhodkonıñ sağlığınen bağlı şikâyetleri yoq. Onı sıçavullar yaşağan kamerağa qapatqanlar. Olarnı sıq-sıq quvmağa kerek ola, dep ayta. Bu onı pek raatsızlay ve raatlanmağa, mahkeme oturışuvlarına azırlanmağa bermey», – dep bildirdi Şeyhmambetov.
Onıñ aytqanına köre, nevbetteki mahkeme oturışuvı noyabrniñ 17-nde saat 14:00-da olacaq, anda qabaatlayıcı tarafnıñ muracaatınen mütehassısnı sorğuğa çekmege planlaştıralar.
Ukraina Pravoslav kilsesi Qırım yeparhiyasınıñ mitropoliti Kliment Oleg Prıhodkonı müsbet taraftan tasvirledi.
Rostov-na-Donu Rusiye mahkemesi sentâbrniñ 7-nde Prıhodkonıñ apis müddetini üç ayğa uzattı.
Yanvarniñ 16-nda berilgen malümatqa köre, Prıhodko «patlayıcı maddelerni ve tertibatnı qanunsız aluv, berüv, satuv, saqlav ve taşuvda» qabaatlandı. Prıhodko daa bir şeyde qabaatlandı – Lvivdeki Rusiye baş konsullığınıñ binasında patlav azırlağanında.
Oleg Prıhodko 2019 senesi oktâbrniñ 10-nda tutuldı. Rusiye FSBsi onı terror ücümini azırlağanında ve patlayıcı maddelerni qanunsız yapqanında qabaatladı.
Qırım Muhtar Cumhuriyetiniñ prokuraturası Qırımda faalniñ apiske alınğanı sebebinden Ukraina Ceza kodeksiniñ 146-ncı maddesiniñ 1-inci qısmına istinaden (azatlıqtan qanunsız şekilde marum etüv) cinaiy tahqiqat başlattı.
Advokat Nazim Şeihmambetovnıñ malümatına köre, Prıhodko Aqmescit SİZOsınıñ mahsus blokunda tutula.
Bundan evel Prıhodko memuriy dava boyunca işğal etilgen Qırımda mesüliyetke çekildi.
Kreml kontrolindeki Qırımnıñ Saq rayon mahkemesi iyünniñ 25-nde qırımlığan 2 biñ ruble para cezasını berdi. Mahkeme onı Rusiye memuriy cinayetler kodeksiniñ 20.3 maddesiniñ birinci qısmına istinaden qabaatlı dep tanıdı. Qırım.Aqiqatnıñ elinde olğan mahkeme qararına köre, faalniñ evinde tintüv vaqtında tutıp alınğan eşya ve vesiqalarnıñ «tedqiqatı» «Prıhodko üçünci şahıslarnıñ bu eşya ve vesiqalarğa irişmesi vastasınen natsist timsallerini propaganda etkenini ve köstergenini» işaretlemekteN
Faalniñ özü evindeki bütün timsaller «antika», dava malümatında olğan svastikalı kölmek ise «suvenir» ve 2010 berli onda olmağanını ayttı.
2019 senesi fevralniñ 8-nde Qırımdaki FSB idaresiniñ hadimleri Oleg Prıhodkonıñ evini tintken edi. Quvetçiler ukrain timsalleri, «Svoboda» firqasınıñ bayraqları, qırmızı-qara bayraqlar, Stepan Banderanıñ süretleri, tehnika ve ev CD-disklerini aldı. Tintüvden soñ Prihodkonı Aqmescitke alıp ketkenler, anda faaliyeti ve esas Ukraina ile bağları aqqında sorap sorğuğa çekkenler.
