Sürgünlikten bir kün evel anam askerlerni çibereknen sıyladı
Sürgünlikten bir kün evel anam askerlerni çibereknen sıyladı
Üsein Bahçisaraylı
Aqmescit – Aqmescit civarındaki Pervomayskoye köyünde yaşağan Şevqiye Abduramanova keçenleri 90 yaşını toldurdı. Şu uzaq 1944 senesi o 20 yaşında genç qız edi.
Şevqiye Abduramanova tuvğanlarınen Balıqlava rayonınıñ Eski Şüli köyünde yaşay edi. 1944 snesiniñ mayıs 18 kününiñ sabasına evlerine bir qaç zabit keldi. «Bizni öldürecekler dep belley edik», - dep hatırlay qartana.
Şevqiye qartananı eñ çoq kederletken şey, sürgünlikten bir kün evel, anası sovet askerlerini çibereknen sıylağan, o özü qardaşınen eşyalarnı temizlep, ütülegen. «Askerlerniñ iç biri, halqımnıñ taqdirinde qara iz qaldırğan kelecek kün aqqında bir şey söylemedi», - dey Şevqiye qartana.
Qırımtatarlarnı 3 eşelon turğan yerge ketirdiler. Şevqiye bitanıñ qorantasını eñ soñki vagonğa yüklep, Uralğa sürgün ettiler.
Yol ne qadar devam etkenini qadın endi hatırlap olamay, amma tren künde bir toqtap, yolda ölülerni qaldırıp, kene suratnen areket etkenini yahşı hatırlay.
Ğurbetlikke kelgeninen, qırımtatarlarğa özlerine kelmek içün üç kün berildi, soñra ormanğa terek pıçmağa yolladılar.
«Bizler içün endi er şey azır edi, nemse esirlerni tutqan yertolelerni boşatıp, baltalarnı qayrap ve ayaqlarğa çarıqlar da azırlağanlar»,– dep hatırlay Şevqiye Abduramanova.
Ormandaki iş içün er işçige 200 gramm ötmek berildi.
Şevqiye Abduramanova aqayınen
Tamam Uralda, Şevqiye Abduramanova olacaq aqayınen tanış olıp, üç balanıñ anası oldı. Uraldan soñ, qoranta Samarkand vilâyeti Cambay şeerine köçti. Şevqiye Abduramanova tikici fabrikasında çalıştı. İmkânları peyda olğanınen qoranta arzusını yerine ketirdi – Qırımğa köçti.
