NATO baş kâtibi Mark Rutte, Rusiyeniñ Poloniya ya da başqa bir Alyans memleketine ücüm etmesi taqdirinde, "yıqıcı" bir cevap berecegini bildirdi, dep ayttı o, Varşavada saban ayınıñ 26-nda.
"Eger bir kimse, Poloniyağa ya da başqa bir ittifaqdaşımızğa ücüm etip, bu elinden keçer, dep tüşünse, o, bu vahşiy Alyansnıñ tam küçü ile qarşılaşacaq. Bizim cevabızım küçlü olacaq. Bu Vladimir Putin ve bizge ücüm etmek istegen er kes içün açıq olmalı", — dep qayd etti Rütte Poloniya baş naziri ile beraber keçken matbuat konferentsiyasında.
NATO-nıñ Poloniyanı er angi vaziyette qorçalamaq mecburiyeti müimdir, dep qoştı Poloniya baş naziri Donald Tusk Rüttenen körüşken soñ.
"NATO Poloniyanı er angi kritik vaziyette qorçalamağa mecbur olğanını tasdıqlamaq bizim içün pek müimdir", — dedi Tusk.
2024 senesi qara qış ayında Poloniya tış işler naziri Radoslav Sikorskiy, Rusiyeniñ NATO ile cenkleşmek içün küçü yetmeycek, amma Alyans ihtimallı ücümge azırlanmaq kerek, dep bildirdi. Azatlıq Radiosına bergen intervyüsında o, Ukrayinanıñ tirenüvi neticesinde Rusiye tanklar ve tehnikanıñ büyük qısmını ğayıp etti, amma onıñ telükesini hafifke almamaq kerek, dep qayd etti. Sikorskiyniñ aytqanına köre, Putinniñ qorquzuvları sebebinden azırlıq körmek kerek, lâkin vaqıtnı tahmin etmek qıyın.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
