Ukrayina Mudafaa naziri Rustem Umerov doquz muavininden üçüni işten çıqardı.
Nazir memleketniñ Nazirler şurasına muavinleri Stanislav Ğayder (Nazir ofisiniñ reberi vazifesine keçe), Oleksandr Serğiy, Yuriy Cığır ve Lüdmila Darağannıñ (devlet kâtibi) işten çıqarıluvına dair imzalağan vesiqasını taqdim etti.
«Ukrayina Mudafaa nazirliginiñ sisteması – Silâlı quvetleri, Baş istihbarat idaresi ve Devlet mahsus naqliyat hızmeti – cenk vaziyeti vaqtında qapalı bir perimetr ola. Bütün esnaslar tam ve kontrol altında olmalı. Olarğa içten ya da tıştan tesir etmek ıntıluvları qabul etilemez. Şu sebepten deñişmeler yapıla», – dep añlattı nazir.
Nazir muavinleriniñ yañı tayinleri aqqında Umerov ayrıca haberdar etecek, dep vade etti.
Qırımtatarı Rustem Umerov bir yıl evelsi Mudafaa naziri vazifesine başladı. Bundan evel ise Devlet mülki fondunıñ yolbaşçısı edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
