Qırımlı iş adamı, metsenat ve Ukraina Yuqarı Radasınıñ «Ğolos» firqasınıñ deputat namzeti Rustem Umerov onıñ esas maqsadı «Qırımnı işğalden qurtaruv» ola, dep bildirdi Qırım.Aqiqat Radiosınıñ yayınında.
«Qırımdaki diñleyicilerge bu vaziyette olarnıñ vekilleri olğanımıznı añlatmaq qıyın. Olar bizni saylamadılar, bu aq olardan alındı. Biz öz regionımıznı temsil etemiz, biz andan, Qırımdanmız. Aynı vaqıtta işğalden qurtaruvnı maqsad dep qoyamız. Bizden küçnen alınğanlarnı özümizge qaytarmağa isteymiz. Bu topraqnı reintegratsiya yapmağa mecburmız – bu yıllar qıyın keçe – medeniyet, siyaset, tasil, insanlarnıñ ihtiyacı olğan bütün mevzularda», – dep ayttı Umerov.
Onıñ qayd etkenine köre, yarımadanı «işğalden qurtaruv strategiyası» yazılmalı ve açıq olmalı, çünki «insanlar nasıl olacağını ve neticeleri ne olacağını añlamaq kerekler».
Ukraina Yuqarı Radasına firqa cedvelleri boyunca Qırımtatar Milliy Meclisiniñ beş vekili namzet kösterecek: qırımtatar halqınıñ lideri Mustafa Cemilev ve Meclis reisiniñ muavini Ahtem Çiygoz (Petro Poroşenkonıñ «Avropa birdemligi» firqası), Meclis reisi Refat Çubarov (İgor Smeşkonıñ «Küç ve namus» firqası), Gayana Yüksel (Ukrainanıñ yeşiller firqası), Qırımtatar Milliy Meclisiniñ azası ve Abmecit Suleymanov («Ukraina Halq Areketi»).
Yuqarı Rada saylavlarına tek Qırımtatar Milliy Meclisiniñ temsilcileri namzet köstermey. Olarnıñ arasında – ukrain jurnalisti ve qırımtatar asıllı devlet erbabı, Ukraina informatsion siyaseti naziriniñ birinci muavini Emine Ceppar («Ğroysmannıñ ukrain strategiyası» firqası), Qırımtatar Milliy Qurultayınıñ delegatı Rustem Umerov, «KrımSOS» teşebbüsiniñ koordinatorı Tamila Taşeva ve «VostokSOS» hayriye fondunıñ icra müdiri Aleksandra Dvoretskaya (üçü de Svâtoslav Vakarçuknıñ «Ses» firqasından), qırımlı bloger ve dizayner Liza Bogutskaya (Volodımır Zelenskıynıñ «Halq hızmetçisi» firqası), qırımlı, Ukrainanıñ sabıq halq deputatı Andrey Sençenko («Aq küçü»), cemaat faali, göñülli, Qırımdan köçken Natalya Lütikova («Ukraina Halq Areketi»).
