Ukrayına Mudafaa naziri Rustem Umerov Ukrayına eyyetiniñ ABD muzakereleriniñ neticeleri aqqında tarif etti.
«Neticelerimizden memnünim. Bir çoq strategik müim körüşüv ve añlaşmalar yaptıq, Mudafaa nazirliginen Biri-birini añlav memorandumı imzalandı. Bizge ne faydası bar? Amerika şirketlerinen silâ ve arbiy tehnika zemaneviy istisalını başlatuv areketini tezleştire. Ava mudafaası, silâ parçaları, tamir, ğayrıdan tiklev ve zemaneviy müessiselerge diqqat ayırıldı. 2024 senesiniñ qısqa planları eki şirketnen imzalandı», – dep ayttı o, Ukrayına milliy telemarafonınıñ yayınında.
Onıñ bildirgenine köre, ABD Mudafaa naziri Lloyd Austin ile keniş meseleler muzakere etildi.
«Em 2024 senesiniñ planları, tezden olacaq maliye, silâ, arbiy tehnika», – dep qoştı Ukrayına naziri.
Ukrayına ve ABD Mudafaa nazirleri Rustem Umerov ve Lloyd Austin dekabrniñ 6-nda Pentagonda körüştiler. ABD Mudafaa nazirligi bildirgenine köre, taraflar Ukrayına-Amerika konferentsiyasınıñ, Ukrayına mudafaa meseleleri bağ gruppasınıñ iş neticelerini muzakere etti.
Beyaz Saray Mudafaa sanayı konferentsiyası Amerika, Ukrayına ve Avropa sanayısınıñ 350 vekilini birleştirdi, dep bildirdi.
Bu afta Ukrayına prezidentiniñ ofis reberi Andriy Yermak, Yuqarı Rada yolbaşçısı Ruslan Stefançuk ve Ukrayına Mudafaa naziri Rustem Umerov ABDni ziyaret etti. Bu ziyaret ABD prezidenti Joe Bidenniñ Ukrayına, İsrail ve diger maqsadlarğa 105 mlrd dollardan ziyade berilüvi aqqında muracaat neticeleri beklengende oldı.
Dekabrniñ 6-nda telükesizlik ihtiyacları içün Ukrayına ve İsrailge yañı maddiy yardım kösterilüvine dair qanun leyhası ABD Senatında cumhuriyetçilerniñ ABD ile Meksika sıñırında immigratsiya kontroli tedbirleriniñ quvetleştirilüvi aqqında talapları sebebinden blok etildi.
ABD prezidenti Joe Biden Ukrayınağa yardım etüv baqıluvına dair rey berüvde muvafaqiyetsizlik mesüliyeti Cumhuriyet firqasına yükledi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
