Ukrayına Yuqarı Radasınıñ insan aqları vekâletlisi Dmıtro Lubinets Ulyanovsk vilâyetiniñ Dimitrovgrad apishanesinde «qırımlı musulmanlar davasınıñ» mabüsi Rustem Seytmemetovnıñ infarkt haberini izaatladı.
Lubinets Rusiye apishanelerinde ukrayınalı siyasiy mabüslerni tutuv şaraitleri «işkencenen bir sayıla», dep ayttı.
«Ukrayınalı siyasiy mabüslerden iç biriniñ tutuv şaraitleri halqara uquq normalarına uyğun degil. Mabüslerniñ sağlığı fenalaşa ve bu işkence dep sayıla. Dünya toplulığını Rusiyeniñ insan aqlarını bozğanına diqqat ayırmağa çağıram», – dep yazdı Lubinets Telegram kanalında.
«Qırım birdemligi» cemaat birleşmesi Rustemniñ ömür arqadaşı Zera Seytmemetovanıñ malümatına esaslanıp, Seytmemetov miokard infarktına oğrağan soñ ameliyat oldı, dep haber etti.
Soy-soplarınıñ malümatına köre, Rustem Seytmemetov mayısnıñ 15-nde yaramadı. Bundan evel onı pek suvuq bir kamerağa karantinge alğan ediler. Anda olğan diger mabüslernen qızmaq içün meşğuliyet yaptı, amma bir kere esini coydı.
Rostov-na-Donu Cenübiy okrugınıñ arbiy mahkemesi 2021 senesi oktâbrniñ 29-nda Bağçasaraydaki üçünci «Hizb ut-Tahrir davasınıñ» mabüslerine üküm çıqardı. Mahkeme olarnı «akimiyetni zorbalıq yolunen zapt etüv ıntıluvında» ve «terror teşkilâtında iştirak etüvde» qabaatlı tanıp, mabüslerni sert rejimli koloniyağa almağa qarar berdi. Bu aqta mahkemeden soñ mahküm etilgen qırımlılarnıñ advokatları bildirdi.
Advokat Edem Semedlâyevniñ malümatına köre, Seytumer Seytumerov 17 yıl sert rejimli koloniyada qalmasına, Osman Seytumerov 14 yıl, Amet Suleymanov 12 yıl, Rustem Seytmemetov 13 yılğa üküm etildi. Advokatnıñ bildirgenine köre, mabüsler başta 3 yıl ve 6 ay apishanede yatmalı.
Hatırlatamız, «Memorial» aq qorçalayıcı merkezi Bağçasaraydaki «Hizb ut-Tahrir davasınıñ» mabüsleri Seytumer Seytumerov, Osman Seytumerov, Amet Suleymanov ve Rustem Seytmemetovnı siyasiy mabüs dep tanıdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
