Rusiye tarafından 14 yılğa mahküm etilgen «Hizb ut-Tahrir davasının» mabüsi, vatandaş jurnalisti Rustem Şeyhaliyevniñ burnu eki kere qanadı. O, Novoçerkassknıñ SİZO №-3-nlen video bağı vastasınen ükümge qarşı istinaf şikâyeti baqılacaq mahkeme oturışuvında iştirak etecek edi. Bu aqta advokat Lilâ Gemeci «Qırım birdemligine» bildirdi.
Birinci kere burnu saba qanadı – berilgen malümatqa köre, Şeyhaliyev kamerada edi ve 10 daqqa devamında onı toqtatıp olamağan edi. O, feldşer çağırmağa talap etip, mahkeme oturışuvında iştirak etmedi. Oña ine yapıldı, ne yapıldı Şeyhaliyev ya da advokatı bilmeyler, ilâc burun qanamasını toqtattı.
Bundan soñ onı kamerağa alğanlar, andan o ve bu dava boyunca mahküm etilgen diger mabüsler oturışuvda iştirak etecek ediler. Amma bu sefer de Şeyhaliyevniñ burnu qanadı. Bu sefer 20 daqqa devamında toqtatıp olamadılar.
Feldşer qırımtatarı SİZO yanındaki sanitar bölükke alınmalı, dep ilân etti – oturışuvda endi iştirak etip olamaz, dep ayttı.
Uquqçı Gemeciniñ aytqanına köre, oturışuvdan evel Şeyhaliyevniñ başı ağıra edi. Erkek köküs ağrısı da bar, dep aytqan edi, amma SİZO oña diagnoz qoyıp baqmağa istemey. Qırımtatarına kardiogramma yapıldı, amma ne diagnoz qoyuldı, ne de bir ilâc berildi.
Aq qorçalayıcılar hatırlatqanına köre, 2023 senesi bu SİZOda 61 yaşında qırımtatar faali Cemil Gafarov vefat etti.
2019 senesi mart ayında Rusiye uquq qoruyıcıları Qırımda qırımtatar faalleriniñ, hususan «Qırım birdemligi» cemaat birleşmesi vekilleriniñ evlerini tintti. Umumen 24 insan tutuldı, aralarında vatandaş jurnalistleri Osman Arifmemetov, Rustem Şeyhaliyev, Remzi Bekirov. 2019 senesi martnıñ 27-nde ve 28-nde Aqmescitteki Rusiye mahkemesi tutulğanlarnı apiske aldı.
«Memorial» aq qorçalayıcı merkezi 2019 senesi martnıñ 27-nde Qırımda Rusiye quvetçileri tarafından tutulğan 24 qırımtatar faalini siyasiy mabüs dep tanıdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
