Rusiye mahkemesi tarafından 13 yılğa üküm etilgen “qırımlı musulmanlar davasınıñ” mabüsi Rustem Seitmemetovnı Salavattaki İK-16-dan (Başqortostan Cumhuriyeti, Rusiye) hastahanege çıqardılar. Bu aqta “Qırım birdemligi” cemaat birleşmesine ömür arqadaşı Zera Zeynetdinova haber etti.
Onıñ aytqanına köre, noyabrniñ 18-nde Seitmemetov oña telefon etti ve ertesi künü onı hastahanege alıp ketecekler, dep haber etti.
“Bir yıl devamında qan basımı de alçaq, de yüksek. Aritmiyası bar edi, başı ağıra. Bir yılda alâmetler bar edi, yahşı teşkermege vaqıt keldi. Şüntirovaniye sebebinden tedqiqler olacaqtır”, – dep qayd etti Zera Zeynetdinova.
Bu yıl yazda Zera Zeynetdinova koloniyada körüşüvden qaytqan soñ aqayınıñ yüregi ağırmağa devam ete ve qan basımı raatsızlay, dep tarif etti.
2024 senesi Rustem Seitmemetov miokard infarktından soñ apishane hastahanesinde yürek ameliyatı yapıldı. O yıl katarakta da qoyuldı ve III derece saqatlığı qoyuldı. Bundan ğayrı, erkekniñ tiş problemleri arttı, bütün bedeni qaşına.
Zera Zeynetdinovanıñ qayd etkenine köre, beş yılda apiste aqayınıñ sağlığı pek fenalaştı ve fenalaşmağa devam ete.
2020 senesi martnıñ 11-nde qırımtatarlarnıñ evlerinde Rusiye FSB hadimleri tarafından teşebbüs kösterilgen tahqiqat tedbirleri başladı. Yedi tintüv keçirildi, insanlar tutuldı: Enver Mustafayev, Seytumer Seytumerov (tarihçı – QA), Osman Seytumerov, Amet Suleymanov, Rustem Seitmemetov. Olarnı Rusiye FSB bölügine alıp kettiler.
Rostov-na-Donu Cenübiy okrugınıñ arbiy mahkemesi 2021 senesi oktâbrniñ 29-nda Bağçasaraydaki üçünci «Hizb ut-Tahrir davasınıñ» mabüslerine üküm çıqardı. Mahkeme olarnı «akimiyetni zorbalıq yolunen zapt etüv ıntıluvında» ve «terror teşkilâtında iştirak etüvde» qabaatlı tanıp, mabüslerni sert rejimli koloniyağa almağa qarar berdi. Bu aqta mahkemeden soñ mahküm etilgen qırımlılarnıñ advokatları bildirdi.
Advokat Edem Semedlâyevniñ malümatına köre, Seytumer Seytumerov 17 yıl sert rejimli koloniyada qalmasına, Osman Seytumerov 14 yıl, Amet Suleymanov 12 yıl, Rustem Seytmemetov 13 yılğa üküm etildi. Advokatnıñ bildirgenine köre, mabüsler başta 3 yıl ve 6 ay apishanede yatmalı.
«Memorial» aq qorçalayıcı merkezi Bağçasaraydaki «Hizb ut-Tahrir davasınıñ» mabüsleri Seytumer Seytumerov, Osman Seytumerov, Amet Suleymanov ve Rustem Seytmemetovnı siyasiy mabüs dep tanıdı.