13 yılğa azatlıqtan marum etilgen Rustem Seitmemetoğa yüregine yapılğan ameliyattan soñ üçünci derece saqatlıq diagnozı qoyuldı, dep haber ete «Qırım birdemligi» ömür arqadaşı Zera Zeynetdinovanıñ malümatına esaslanıp.
2024 senesi mayıs ayında Seitmemetov miokard infarktı oldı, ondan soñ yürek ameliyatını keçirdiler. Bir qaç aydan soñ alı daa beter oldı, Salavat şeerindeki tüzetüv koloniyasınıñ memuriyeti onı apishane hastahanesine alıp ketti. Ekimler Seitmemetovnı baqtı, neticelerine köre oña üçünci derece saqatlıq gruppası diagnozı qoyuldı. Qırımlı diagnozını tasdıqlamaq ve saqatlıq gruppasını uzatmaq içün er yıl teşkerüvden keçmek kerek.
«Apiske alınmazdan evel yürek problemleri yoq eti. Beş yıl devamında sağlığı yaramay tarafqa deñişe», – dep tarif etti Zera Zeynetdinova.
Bundan ğayrı, Seitmemetovnı apiske alınmazdan evel olmağan qan basımı ve közlerniñ kataraktası raatsızlay. Tibbiy teşkerüvniñ neticelerine esaslanıp, qırımlığa ilâclar yazıldı, lâkin olarnıñ çoqusı koloniyanıñ tibbiy bölüginde ruhset berilgenlerniñ cedvelinde yoq.
Rostov-na-Donu Cenübiy okrugınıñ arbiy mahkemesi 2021 senesi oktâbrniñ 29-nda Bağçasaraydaki üçünci «Hizb ut-Tahrir davasınıñ» mabüslerine üküm çıqardı. Mahkeme olarnı «akimiyetni zorbalıq yolunen zapt etüv ıntıluvında» ve «terror teşkilâtında iştirak etüvde» qabaatlı tanıp, mabüslerni sert rejimli koloniyağa almağa qarar berdi. Bu aqta mahkemeden soñ mahküm etilgen qırımlılarnıñ advokatları bildirdi.
Advokat Edem Semedlâyevniñ malümatına köre, Seytumer Seytumerov 17 yıl sert rejimli koloniyada qalmasına, Osman Seytumerov 14 yıl, Amet Suleymanov 12 yıl, Rustem Seytmemetov 13 yılğa üküm etildi. Advokatnıñ bildirgenine köre, mabüsler başta 3 yıl ve 6 ay apishanede yatmalı.
«Memorial» aq qorçalayıcı merkezi Bağçasaraydaki «Hizb ut-Tahrir davasınıñ» mabüsleri Seytumer Seytumerov, Osman Seytumerov, Amet Suleymanov ve Rustem Seytmemetovnı siyasiy mabüs dep tanıdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
