Rusiye mahkemesi mahküm etken Bağçasaraydaki «Hizb ut-Tahrir davasının» mabüsi Rustem Seytmemetovnıñ eki közünde de katarakta bar. Bu aqta «Qırım birdemligi» cemaat birleşmesi haber ete.
Apayı Zera Seytmemetovanıñ aytqanına köre, qırımlınıñ köz problemleri Novoçerkassk SİZOsında başladı. Soñra ekim katarakta taptı, lâkin Dimitrovgrad apishanesinde ameliyat yapmağa imkân yoq.
«Üç yıl devamında ekimlerge muracaat etti, amma tedaviylenmedi. Cemil ağanıñ [Novoçerkassk SİZOsında can bergen siyasiy mabüs Cemil Gafarov] közlügini bergenler, bu közlükni qullana», – dep tarif etti ömür arqadaşı.
Berilgen malümatqa köre, Seytmemetovnıñ gipertoniyası bar. Onıñ alâmetlerini alalar, amma bir qaç kere ekim çağırmağa mecbur olalar.
Qırımlınıñ advokatqa aytqanına köre, mabüslerniñ kerekli urbaları yoq. Qış ayaqqabı yoq, iç çamaşır berilmedi.
Rostov-na-Donu Cenübiy okrugınıñ arbiy mahkemesi 2021 senesi oktâbrniñ 29-nda Bağçasaraydaki üçünci «Hizb ut-Tahrir davasınıñ» mabüslerine üküm çıqardı. Mahkeme olarnı «akimiyetni zorbalıq yolunen zapt etüv ıntıluvında» ve «terror teşkilâtında iştirak etüvde» qabaatlı tanıp, mabüslerni sert rejimli koloniyağa almağa qarar berdi. Bu aqta mahkemeden soñ mahküm etilgen qırımlılarnıñ advokatları bildirdi.
Advokat Edem Semedlâyevniñ malümatına köre, Seytumer Seytumerov 17 yıl sert rejimli koloniyada qalmasına, Osman Seytumerov 14 yıl, Amet Suleymanov 12 yıl, Rustem Seytmemetov 13 yılğa üküm etildi. Advokatnıñ bildirgenine köre, mabüsler başta 3 yıl ve 6 ay apishanede yatmalı.
Hatırlatamız, «Memorial» aq qorçalayıcı merkezi Bağçasaraydaki «Hizb ut-Tahrir davasınıñ» mabüsleri Seytumer Seytumerov, Osman Seytumerov, Amet Suleymanov ve Rustem Seytmemetovnı siyasiy mabüs dep tanıdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
