Rusiye mahkemesi uquqçığa 50 biñ ruble tölemege emir etti, onı Rusiye ordusınıñ «areketlerinen razı olmağanında» qabaatladılar.
Davanıñ sebebi Rusiye siyasetçisi Grigoriy Yavlinskiyniñ 2017 senesi çıqqan videosını uquqçınıñ şahsiy Facebook saifesinde paylaşqanı oldı. Videoda siyasetçi Suriye ve Ukrayina vaqiaları «Rusiye içün on yıllar, belki de asırlar devamında unutılmaycaq ahlâqiy felâket olğanını» ayta.
Mahkemede mudafaa tarafı qayd etti ki, video Rusiye Federatsiyası Silâlı Quvetlerini «itibardan tüşürüv» içün mesüliyetni kirsetken qanun qabul etilmezden çoq evel derc etilgen. Bu tek 2022 senesi oldı, ve qanunnıñ keri tesiri yoq, dep Kâmilev ve qorçalayıcısı mahkemege yetkizmege tırıştılar. Lâkin mahkeme bu delilge qulaq asmadı.
Bundan ğayrı, imaye tarafı qayd etti ki, dava malümatında mahkeme ekspertizası ya da Kâmilevniñ video paylaşuvında «itibardan tüşürüv» olğanını tasdıqlağan ekspertniñ qararı yoq.
«Birinci ve ekinci instantsiya mahkemesiniñ qararları tek areketlerimde [videonı paylaşmaq – QA] itibardan tüşürgenine yönelgen areketler bar olğanı aytılğan protokolnı tizgen hadim Filatovnıñ fikrine esaslana. Biz bu memuriy mesüliyetke çekmek içün qanunsız sebep ola dep tüşünemiz», – dedi Kâmilev «Qırım birdemligine».
Bundan da ğayrı, imaye tarafı qayd etkenine köre, birinci instantsiya mahkemesiniñ soñki qararında «ciddiy yañlışlar» bar. Meselâ, vesiqada Kâmilevniñ degil, Appazov degen biriniñ adı yazılğan edi. Mahkeme hatanı tek bu qısımda tüzetmege razı oldı.
Kâmilevniñ bildirgenine köre, mahkeme oturışuvı vaqtında qadı Dyaçenko imaye tarafına «bir taraflı oldı».
«Men advokat Kurbedinovnıñ şikâyetini telefon vastasınen baqqanda tenbiledi: mahkemege ürmetsizlik yapa ekenim. Men kâğıt şikâyetim olmağanını ve onı telefonımdan oquğanımnı añlattım, amma qadı buña razı olmadı. Bundan ğayrı, bu Grigoriy Yavlinskiyniñ repostı dep başlağanımızda, qadı qaba bir şekilde bizni toqtattı. Bu videoda iç bir türlü beyanat ve qoşmalar, em de izaatlar yoq edi, şunıñ içün biz [menim areketlerimde] cinayet olmağanını qayd ettik», – dep qoştı uquqçı.
Roskomnadzor Qırım.Aqiqat saytını blok etti.Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
