Rusiye Federatsiyasınıñ akimiyeti tarafından mahküm etilgen qırımlı Rustem Gugurik Burâtiyada cezasını çekip, sentâbr ayında bir sebep olmasa da, 15 künge ceza izolâtorına qapatıldı. Bu aqta soyu Tatyana Lukyanenko Varşavada OSCE insan ölçüvi halqara konferentsiyasında ayttı.
Onıñ qayd etkenine köre, Aqmescitteki SİZO-2-de bulunğanda o, maneviy ve fizikiy basqığa oğradı, tibbiy yardım alamay, sağlığı fenalaşa.
Mabüs Appaz Kurtametniñ anası Ayşe Kurtamet babası Halil Kurtamet Rusiye işğal etken Herson vilâyetinde nezaret altında buluna ve oña qarşı qabaatlavlar azırlana, dep bildirdi. O, mabüsniñ babası nede qabaatlana aytmadı, amma Appaz Kurtametniñ cinaiy taqip etilüvi Rusiye mahsus hızmetlerinen işbirligi yapmağa razı olmağanınen bağlı, dep qayd etti.
Bundan ğayrı, konferentsiyada qırımlı mabüs Marlen Mustafayevniñ qız qardaşı Emine Mustafayeva çıqış yaptı. Onıñ malümatına köre, Mustafayev FSBge ketirilgende köteklendi, başına pıştav tutıp, evinde tapılğan dep kösterilgen diniy edebiyatta parmaq izlerini qaldırmağa talap etkenler. Red etse de ve başqa bir delil olmasa da, mahkeme onı qabaatlap, 17 yılğa azatlıqtan marum etti.
2022 senesi oktâbr ayında Rusiyeniñ nezaretinde olğan Aqmescit şeeriniñ Kiyev rayon mahkemesi Rusiyede yasaq etilge «Noman Çelebicihan adına qırımtatar batalyonında» iştirak etüv qabaatı ile Herson vilâyetinden qırımtatar taksici Rustem Gugurikni 8,5 yıl sert apis cezasına mahküm etti.
«Gratı» ukrayın neşriniñ malümatına köre, martnıñ 27-nde aqşam Rustem Gugurik apayı ve 6 yaşındaki qızınen beraber Rusiye tarafından işğal etilgen Novoalekseyevka qasabasından Qırımğa yol alğan edi. Rusiye büyük istilâsını başlamazdan evel çoq balalı baba taksici olaraq çalışqan. Cenk başlağan soñ qorantasını Bağçasaraydaki soylaprını alıp ketmege tırışqan, amma bunı yapamağan. Araba rusiye yoqlav keçitene kelir eken yolcular pasportlarını teşkerüv içün bergenler. Bundan soñ Rusiye FSB hadimleri Gugurikni yaqalağan.
Martnıñ 31-nde Rusiyeniñ nezaretinde olğan Aqmescit şeeriniñ Kiyev rayon mahkemesi Rustem Gugurikni «Noman Çelebicihan adına qırımtatar batalyonında» iştirak etüv qabaatı ile eki buçuq ayğa tevqif etkeni belli oldı.
Qayd etmek kerek ki, Rusiye FSBsi «Noman Çelebicihan qırımtatar göñülli batalyonına» Gugurik tutulğan soñ terror teşkilâtları cedveline kirsetti.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
