Rusiye akimiyeti tarafından mahküm etilgen qırımlı Rustem Gugurik koloniyada sağırlaşa ve nefes alması zorlaşqanına baqmadan, yürek ilâclarını alamay. Bu aqta Qırım.Aqiqat mühbirine ömür arqadaşı Viktoriya Gugurik bildirdi.
Apayınıñ malümatına köre, aşqazan problemleri arttı – aşağan soñ ağrısı ola. Tiş ekiminiñ yardımına da ihtiyacı bar. Burâtiy koloniyasında Rustem Gugurikke tibbiy yardım bir ultrases talili ve glitsinnen sıñırlandı.
Bundan ğayrı, belli olğanına köre, siyasiy mabüs terrorizmge meyilli olğanlar içün baraqta tutula, yarım yılda üç kere onı ceza izolâtorına qapatqanlar. Viktoriya Gugurikniñ malümatına köre, şaraitler umumen bir qarar, lâkin mabüsler tutulğan baraqta sıçanlar bar.
Sağlığı fenalaşqanı ve muntazam sürette tibbiy baqıluvına ihtiyacı olğanından Viktoriya Gugurik Ukrayina akimiyetini ve halqara ortaqlarını aqayını azat etmege yardım etmege çağırdı.
2022 senesi oktâbr ayında Rusiyeniñ nezaretinde olğan Aqmescit şeeriniñ Kiyev rayon mahkemesi Rusiyede yasaq etilge «Noman Çelebicihan adına qırımtatar batalyonında» iştirak etüv qabaatı ile Herson vilâyetinden qırımtatar taksici Rustem Gugurikni 8,5 yıl sert apis cezasına mahküm etti.
«Gratı» ukrayın neşriniñ malümatına köre, martnıñ 27-nde aqşam Rustem Gugurik apayı ve 6 yaşındaki qızınen beraber Rusiye tarafından işğal etilgen Novoalekseyevka qasabasından Qırımğa yol alğan edi. Rusiye büyük istilâsını başlamazdan evel çoq balalı baba taksici olaraq çalışqan. Cenk başlağan soñ qorantasını Bağçasaraydaki soylaprını alıp ketmege tırışqan, amma bunı yapamağan. Araba rusiye yoqlav keçitene kelir eken yolcular pasportlarını teşkerüv içün bergenler. Bundan soñ Rusiye FSB hadimleri Gugurikni yaqalağan.
Martnıñ 31-nde Rusiyeniñ nezaretinde olğan Aqmescit şeeriniñ Kiyev rayon mahkemesi Rustem Gugurikni «Noman Çelebicihan adına qırımtatar batalyonında» iştirak etüv qabaatı ile eki buçuq ayğa tevqif etkeni belli oldı.
Qayd etmek kerek ki, Rusiye FSBsi «Noman Çelebicihan qırımtatar göñülli batalyonına» Gugurik tutulğan soñ terror teşkilâtları cedveline kirsetti.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
