Rusiye akimiyeti işğal etilgen Qırımda Rusiye zabitine suiqastnı teşkil etmege tırışqanında şübheli sayğan Ukrayina vatandaşı Rustem Fahriyev Rosfinmonitoringniñ terrorist ve ekstremist cedveline kirsetildi. Bu aqta müessise saytında haber etile.
Rusiye akimiyeti Rustem Seithaliloviç Fahriyevni Ukrayina Mudafaa nazirligi Baş istihbarat idaresiniñ hadimi dep adlandıra. Qayd etilgenine köre, o, Rusiye Federatsiyasınıñ Krasnodar ülkesindeki Abinskte 1984 senesi dekabrniñ 25-nde doğdı.
Dekabrniñ başında FSB Qırımda Ukrayina Mudafaa nazirligi Baş istihbarat idaresiniñ Rusiye Federatsiyası Mudafaa nazirligi üyken zabitlerinden birine qarşı azırlanğan "terror ücüminiñ" ögüni aldı, dep bildirdi. Fahriyevke qarşı Rusiye Ceza kodeksiniñ 205.1 maddesine istinaden (terror faaliyetine qoltutuv) cinaiy dava açıldı. Mahkeme qararınen o, ğıyabiy şekilde apiske alındı.
"ÇP/Krım" Telegram kanalı bildirgenine köre, 2014 senesi Fahriyev Rusiye vatandaşlığını almaq içün vesiqa berdi. Soñra Ukrayinağa ketti, Milliy gvardiyanıñ mahsus bölük batalyonına qoşuldı, 2015 senesi Donbasta arbiy operatsiyada iştirak etken eken. Haber etkenine köre, soñra Fahriyev Ukrayina baş istihbarat idaresiniñ mahsus operatsiyalar quvetlerinde hızmet etti ve "Qırımtatar Milliy Meclisinen bağları bar".
FSB bildirgenine köre, Fahriyev Lübnan ve Afğanistanda Ukrayina Mudafaa nazirligi Baş istihbarat idaresiniñ operatsiyalarında iştirak etken eken. Ukrayina akimiyeti ve Baş istihbarat idaresiniñ vekilleri bu malümatnı şimdilik izaatlamadılar.
Cenk şaraitlerinde Qırım.Aqiqat muarririyetiniñ Rusiye mahsus hızmetleri ve akimiyetiniñ beyanatlarını tez teşkerip olamay.
