“Qırımlı musulmanlar davası” boyunca 17 yılğa üküm etilgen ve Rusiyeniñ Tver vilâyetindeki Bejetsk №6 koloniyasında cezasını çekken Rustem Emiruseinovnıñ acele şekilde tiş protezleri yapılmalı. Bu aqta apayı Aliye Emiruseinova “Qırım birdemligine” bildirdi.
Oktâbrniñ soñunda qadın Tver vilâyetindeki Bejetskniñ №6 koloniyasında aqayınen uzun körüşti.
Aliyeniñ tarif etkenine köre, aqayınıñ tiş problemleri apiske alınmazdan evel de bar edi, amma apishane şaraitlerinde daa beter oldı. Saratov apishanesinde alt protezleri yapıldı, çünki “tişler töküle edi ve olarnı çıqarmaq kerek edi”. Aliye Emiruseinovanıñ aytqanına köre, üst tişleri bütünley töküldi ve tek çıqarılacaq tamırları qaldı.
“Alt protezleri de bir hasta tişte tutula. Onı da çıqarsalar, Rustem çaynap olamaz ve bu meni pek qasevetlendire. Vaziyet pek qıyın. Şeker hastalığı bar, çaynap olamağan apishane aşından ise aşqazan ve içeklerde problemler başlanacaq”, – dep ayttı Aliye.
Rustem Emiruseinov – qırımtatarı, çoq balalı baba ve Qurman rayonınıñ iş adamı. Onı 2019 senesi fevral ayında Qurman rayonınıñ Büyük Onlar (Oktâbrskoye) qasabasında tutqanlar. Rusiye FSBsi qırımlı Rusiyede ve işğal etilgen Qırımda yasaqlanğan "Hizb ut-Tahrir" teşkilâtında iştirak etkeninde qabaatlana, dep bildirgen edi.
Rusiyeniñ Rostov-na-Donu Cenübiy okrugınıñ arbiy mahkemesi 2020 senesi noyabrniñ 3-nde Qurmandaki «Hizb ut-Tahrir davasınıñ» üç mabüsini 42 yıl apiste qalmasına üküm etti, olardan biri Emiruseinov ola. Mahkeme onı 17 yıl apiste qalmasına üküm etti, eki yılını apishanede, qalğanını sert rejim koloniyasında keçirecek.
