17 yılğa üküm etilgen ve Rusiyeniñ Tver vilâyetindeki Bejetskte №6 koloniyada cezasını çekken «qırımlı musulmanlar davasınıñ» mabüsi Rustem Emiruseinovnıñ şeker hastalığı bar ve bağlı qıyınlıqları zorlay. Bu aqta ömür arqadaşı Aliye Emiruseinova «Qırım birdemligine»bildirdi.
Onıñ aytqanına köre, qırımlınıñ teri hastalıqları başladı, şeker hastalığı sebebinden fenalaşa.
«Meselâ, bir yerini çizse, yarası şişe ve qapalmay. Şekernen bağlıdır, dep tüşünem», – dep qayd etti Aliye.
Emiruseinovnıñ sağlıq problemleri Rusiyeniñ Saratov vilâyetindeki Balaşov şeeriniñ apishanesinde başladı. O, ayaqları pek qaşına ve pek azdı, dep şikâyet etken edi – eki ayda 16 kg azdı. Közleri de yaramay körip başladı, ne oquy, ne de yaza bildi. Apishane hastahanesinde diagnoz qoyuldı – şeker hastalığı.
2024 senesi aprel ayında Emiruseinov Bejetskteki İK-6-ğa etap etildi.
Rusiyeniñ Rostov-na-Donu Cenübiy okrugınıñ arbiy mahkemesi 2020 senesi noyabrniñ 3-nde Qurmandaki «Hizb ut-Tahrir davasınıñ» üç mabüsini 42 yıl apiste qalmasına üküm etti, olardan biri Emiruseinov ola. Mahkeme onı 17 yıl apiste qalmasına üküm etti, eki yılını apishanede, qalğanını sert rejim koloniyasında keçirecek.
Rustem Emiruseinov 2019 senesi fevral ayında Qurman rayonınıñ Büyük Onlar (Oktâbrskoye) qasabasında tutuldı. Rusiye FSBsi qırımlı Rusiyede ve işğal etilgen Qırımda yasaqlanğan «Hizb ut-Tahrir» teşkilâtında iştirak etkeninde qabaatlana, dep bildirgen edi.