Advokat Sergey Slepuhin «qırımlı musulmanlar davası» boyunca mahküm etilgen Rustem Emiruseinovnı Rusiyeniñ Saratov vilâyetine etap etilgen soñ ilk sefer ziyaret etti. Bu aqta «Qırım birdemligi» cemaat birleşmesi haber ete.
Qayd etilgenine köre, Emiruseinov şimdi Saratov vilâyetiniñ Balaşov şeerindeki apishanede karantinde buluna. O, mında 2022 senesi yanvarniñ 10-nda keldi. Şimdilik Saratovdaki «E» merkeziniñ hadiminden ğayrı kimse onnen laf etmegen edi.
«Rustem oña özüni qabaatlı dep saymağanını ve ekstremist ya da terrorist olmağanını añlattı, soñra uquq qoruyıcı ketti», – dep tarif etti advokat.
Uquqçı bergen malümatqa köre, Emiruseinovnıñ ilâcları etap vaqtında alındı ve qaytarılmadı.
«Sağlığı bir qarar, iklimge daa alışmağanı içün başı ağıra, başqa bir şey raatsızlamay. Qurannı da alğanlar, amma kelişken soñ qaytarğanlar», – dep qoştı advokat.
Qırımlınıñ uquqçığa tarif etkenine köre, bu apishanedeki aşlar pek qıt. Onı bir kişilik kamerada tutalar.
Advokat Emiruseinovnı parmaqlıq arqasında kördi ve yaqın tuvğanlarınıñ mektüplerini berdi.
Rusiyeniñ Rostov-na-Donu Cenübiy okrugınıñ arbiy mahkemesi noyabrniñ 3-nde Qurmandaki «Hizb ut-Tahrir davasınıñ» üç mabüsini 42 yılğa apiske aldı, olarnıñ arasında Emiruseinov da bar. Mahkeme onı ilk eki yılını apishanede, qalğanını sert rejimde keçirecek 17 yılğa üküm etti.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
