Link açıqlığı

Saatnıñ esas haberi

17 yılğa üküm etilgen Rustem Emiruseinov Rusiyeniñ Saratov vilâyetine etap etildi – faaller


Rustem Emiruseinov
Rustem Emiruseinov

17 yılğa azatlıqtan marum etilgen Qırımdaki «Hizb ut-Tahrir» davasınıñ mabüsi Rustem Emiruseinov Rusiyeniñ Cezalarnı yerine ketirüv federal hızmetiniñ Saratov vilâyetindeki müessiselerinden birine etap etildi. Bu aqta «Qırım birdemligi» cemaat birleşmesi ömür arqadaşınıñ malümatına esaslanıp bildire.

Bundan evel Rustem Emiruseinov bir yıldan berli Novoçerkassk (Rusiye) SİZO-3-te tutulğan edi.

«Novoçerkassknıñ SİZO-3 yazıhanesi siyasiy mabüsniñ apayına Rustem Emiruseinov Saratov vilâyetiniñ diger penitentsiar müessisesine yolladılar, dep haber etti», – dep aytıla haberde.

Rustem Emiruseinov 2019 senesi fevral ayında Qırımnıñ Qurman rayonındaki Büyük Onlar qasabasında tutuldı. Rusiye FSBsi qırımlınıñ Rusiyede ve işğal etilgen Qırımda yasaqlanğan «Hizb ut-Tahrir» teşkilâtınıñ faaliyetinen alâqası bar, dep bildirgen edi.

2020 senesi noyabrniñ 3-nde saba Rostov-na-Donu Cenübiy okrugınıñ arbiy mahkemesi Qurmandaki «Hizb ut-Tahrir davasınıñ» üç mabüsi Rustem Emiruseinov, Arsen Abhairov ve Eskender Abdulganiyevni 17, 13 ve 12 yılğa üküm etti. Olar qabaatlarını tanımadı. Mahküm etilgen qırımlılarnıñ advokatları ükümni şikâyet etip, Avropa insan aqları mahkemesine barmağa niyetlene.

Qırımdaki «Hizb ut-Tahrir davaları»

«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.

«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.

XS
SM
MD
LG