Rusiye işğal etilgen Qırım territoriyasında Ukrayinanıñ milliy azlıqları ve tamır halqlarınıñ aqlarını muntazam sürette boza. Bu aqta Ukrayina Prezidentiniñ QMC-deki daimiy temsilcisi Ölğa Kurışko bildirdi, dep haber ete "Ukrinform".
"Temsilcilik Ukrayinanıñ tamır halqlarını — qırımtatarlar, qaraylar ve qırımçaqlarnı qorçalamaq saasında çalışa, vaqtınca işğal etilgen Qırım territoriyasında olğan malümatnı nezaret ete, ve biz qayd ete bilemiz ki, Rusiye Federatsiyasınıñ sistematik siyaseti asırlar devamında deñişmey. Rusiye Federatsiyası, Rusiye İmperiyası ve Sovetler Birliginiñ mirasçısı olaraq, tamır halqlar ve milliy azlıqlarnıñ aqlarını boza", — dedi o.
Kurışko, tamır halqlarnıñ aqlarınıñ bozuluvını belgileycek üç esas noqtanı ayttı.
Birincisi — Rusiye Federatsiyasınıñ müstemleke siyasetidir. Onıñ aytqanına köre, şimdi yarımadada yaşağan ealiniñ sistematik deñişüvi yapıla.
O, hatırlattı ki, 800 biñden 1 millionğa qadar Rusiye vatandaşı Qırımğa qanunsız köçip keldi, bu ise Rusiye işğal etilgen topraqnıñ ealisini deñiştirmege ve oña sadıq adamlarnı yerleştirmege tırışqanını köstere.
Ekinci sebep — işğal şaraitinde öz medeniyetini ve tilini inkişaf ettirmemek. "Qırımtatar tili ğayıp olmaq üzre, şunıñ içün tamır halqlarnıñ vatanı olğan Qırım yarımadasında qırımtatar tilini ögrenmek ve qullanmaq imkânı olmağanı pek yaramaydı", — dep qayd etti o.
Üçünciden, dedi Kurışko, 2022 senesi Rusiye milliy azlıqlarnı qoruv Avropa çerçive konventsiyasından çıqtı, ve bu, RF-niñ tek işğal etilgen topraqta degil, Rusiye toprağında yaşağan ealiniñ farqlı gruppalarına nisbeten munasebetini köstere.
"Şimdi tasil ve medeniyet sisteması vastasınen tek bir yöneliş inkişaf ete — bu ealiniñ ruslaştıruvı, böyle topraqlarda Rusiye kimliginden ğayrı er angi diger kimlikniñ yoq etilmesidir", — dep qoştı o.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
