«Qırım birdemligi» vatandaş teşebbüsiniñ er ay keçirilgen körüşüvine advokat Lilâ Gemeci mektüp ketirdi. O, Lilâğa Rostov-na-Donu şeeriniñ SİZOsından keldi. Mektüpni Aqmescitteki ekinci «Hizb ut-Tahrir davasınıñ» mabüsi Ruslan Suleymanov yolladı. Advokat onı oqudı, Ruslan Suleymanovnıñ anası diñlep ağladı. Al-azırda eki oğlu da apiste yata – Ruslan ve Eskender.
Ruslan Suleymanov – Aqmescit rayonı Mamaq (Stroganovka) köyüniñ sakini, «Qırım birdemliginiñ» faali, semetdeşleriniñ Rusiye mahsus hızmetleri tarafından taqip etilüvine qarşı «Qırımtatarlar – terrorist degil» bir kişilik narazılıqlarınıñ iştirakçisidir. 2019 senesi mart ayında evi tintildi. Ruslan Suleymanov «Hizb ut-Tahrir» ile alâqaları bar olğanında qabaatlanıp tutuldı. 2019 senesi martnıñ 27-nden berli apiste yata.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
Facebook Forum