Rusiye mahkemesi tarafından 14 yılğa üküm etilgen qırımlı faal ve vatandaş jurnalisti Ruslan Suleymanovnı Rusiyeniñ Novoçerkassk şeerinden Çelâbinsk vilâyetiniñ Verhneuralsk apishanesine etap ettiler.
Bu aqta o, aprelniñ 14-nde yollağan mektübinde tarif etti, dep yaza «Qırım birdemligi» cemaat birleşmesi.
Suleymanovnıñ aytqanına köre, etap 26 kün sürdi. Faalniñ bildirgenine köre, o, Novoçerkasstan çıqtı, Voronej, Tambov, Penza, Samara, Orenburg, Orsk, Çelâbinsk ve Magnitogorsktan «stolıpin» vagonlarında ketip, Verhneuralskqa keldi. Suleymanov dört farqlı SİZOda qaldı, dep bildirdi. Anda kirmezden evel mahsus bokslarda çoq saat bekledi. Voronejniñ №1 SİZOsında o, yüksek sıcaqlı bir hastalıq keçirdi.
«Trennen beş gece kettim. 10 avtozak deñiştirdim. Avtozaktan «stolıpin» vagonına qadar bazı stantsiyalarda qolunda çantalarnen, beraber, alatnen bağlı, cayav. Vagonlarda saatqa köre ayaqyolğa çıqarğanlar, künde üç kere qaynağan suv bergenler. Umumen insan içün etap qolay bir sınav degil, stress is etile. Böyle vaziyette esli-başlı, hasta insanlarnı tüşünesiñ», – dedi Ruslan.
Al-azırda Suleymanov karantin kamerasına alındı.
2019 senesi martnıñ 27-nde Qırımnıñ Aqmescit rayonındaki Bavurçı (Kamenka) qasabasında ve Mamaq (Stroganovka) köyünde qırımtatarlarnıñ evlerinde tintüvler keçirildi. Malümat çoq olğanı içün uquq qoruyıcılar 25 qırımtatar cemaat faalinden cinaiy davanı beş mabüslik beş gruppağa böldi. Aman-aman bütün tutulğanlar cemaat jurnalisti ya da cemaat faali edi.
«Memorial» aq qorçalayıcı merkezi 2019 senesi martnıñ 27-nde Qırımda Rusiye quvetçileri tarafından tutulğan 24 qırımtatar faalini siyasiy mabüs dep tanıdı.
2022 senesi noyabrniñ 24-nde Rostov-na-Donudaki Cenübiy arbiy okrugınıñ mahkemesi «qırımlı musulmanlar davası» boyunca beş qırımtatarına üküm çıqardı. Vatandaş jurnalisti Ruslan Suleymanov 14 yıl sert rejimli koloniyada qalmasına üküm etildi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
