«Bugün Qırımnıñ Rusiye işğalci akimiyeti Ruslanğan 14 yıl apis cezası üküm çıqarğanınıñ bir yılı tola. Advokat vastasınen bildire bilgen malümatı qasevetlendire, onıñ sağlığı ve telükesizliginden qasevetlenemiz. Onı tez azat etmege talap etemiz», – dep bildirdi Berit Lindeman, Norveç Helsinki komitetiniñ baş kâtibi.
Onıñ qayd etkenine köre, Rusiye ordusı 2014 senesi Qırımnı işğal etken soñ Rusiyeniñ qırımtatar halqına yapqan repressiyalarına qarşı çıqıp, «Qırım birdemligi» areketiniñ faal iştirakçisi edi.
Lindeman hatırlatqanına köre, Suleymanov evli ve üç bala babası ola. 2020 senesi facia neticesinde üç yaşında oğlu Musa vefat etti. Ruslan apishaneden cenazege yiberilmedi, qorantasına onen körüşmege izin berilmedi.
«Yaqında Ruslannıñ ömür arqadaşı ve anasınen laf ettim. Vaziyetlerini diñlemek qorqunç, Ruslan pek yetmey. Qorantasını qorumaq ve memleketini qorçalamaq içün evine qaytmalı», – dedi Lindeman.
Komitetniñ baş kâtibi «Ruslanğa küreşi ve cesaretini köre ve unutmaylar» dep hatırlatmaq içün Novoçerkassk SİZOsına mektüp yolladı. Qayd etilgenine köre, dünyadaki ortaqlarımıznen beraber Norveç Helsinki komiteti Rusiye apishanelerinde tutulğan bütün siyasiy mabüslerniñ azat etilmesini talap etecek.
2019 senesi martnıñ 27-nde Qırımnıñ Aqmescit rayonındaki Bavurçı (Kamenka) qasabasında ve Mamaq (Stroganovka) köyünde qırımtatarlarnıñ evlerinde tintüvler keçirildi. Malümat çoq olğanı içün uquq qoruyıcılar 25 qırımtatar cemaat faalinden cinaiy davanı beş mabüslik beş gruppağa böldi. Aman-aman bütün tutulğanlar vatandaş jurnalisti ya da cemaat faali edi.
2022 senesi noyabrniñ 24-nde Rusiyeniñ Rostov-na-Donu Cenübiy okrugınıñ arbiy mahkemesi «qırımlı musulmanlar davası» boyunca beş qırımtatarınıñ ükmüni çıqardı. Vatandaş jurnalisti Ruslan Suleymanov 14 yıl sert rejimli koloniyada qalmasına üküm etildi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
