Qırımtatarınıñ hronik hastalığı bar ve şimdi yanğı başladı.
Ruslan Nagayevniñ apayı Zarema Nagayevanıñ aytqanına köre, aqayı bir ay içinde eki kere apishane hastahanesine çıqarıldı, alâmetlerini eksiltmege tırışqanlar. Baqa bilecek mütehassıs öyle de baqmadı.
Nagayevler qorantası apishane hastahanesine şahsiy ekimni çağırğan soñ Ruslannıñ yanğısı bar olğanı ve ameliyat yapılacağı belli oldı, dep bildirdi siyasiy mabüsniñ ömür arqadaşı.
Hastahanede bir qaç kün baqıp apishanege qaytarğanlar, amma Ruslannıñ tutuvı oldı. Onı kene Rusiye Cezalarnı yerine ketirüv federal hızmetiniñ hastahanesine alıp ketkenler, lâkin yapılğan tedaviyler faydalı olmadı. Zarema Nagayeva ömür arqadaşınıñ ameliyatı apishane degil de, şeer hastahanesinde yapılacaqtır, dep qayd etti. Ameliyatnıñ künü belli degil. Şimdi Ruslannıñ alı bir qarar, dep ayttı ömür arqadaşı.
Nagayev mütehassıs ekimniñ yardımına ihtiyacı bar dep çoq ayttı, amma apishane memuriyeti ricalarına emiyet bermedi.
«Ekim apishanege keldi, amma Nagayevni qabul etmedi», – dep ayttı advokatı Yevgeniy Goroşko.
Nagayevniñ yüksek qan basımı bar, büyrekleri ağıra ve apishanede tedaviylenmey.
2019 senesi iyünniñ 10-nda Aluşta, Qarasuvbazar ve Aqmescit rayonlarında qırımtatarlarnıñ evlerinde keçirilgen tintüvlerden soñ sekiz kişi tutuldı: Ruslan Nagayev, Eldar Kantemirov, Ruslan Mesutov, Lenur Halilov, Riza Ömerov, Enver Ömerov, Ayder Cepparov ve Eskender Suleymanov.
Rusiye akimiyeti Nagayev ve Umerovnı Rusiyede terroristik tanılğan, amma bir çoq memlekette milliy qanunlar seviyesinde sıñırsız faaliyet köstergen «Hizb ut-Tahrir» islâm siyasiy firqasınen alâqaları bar dep qabaatladı.
2021 senesi avgustnıñ 16-nda Cenübiy okrugınıñ arbiy mahkemesi «Aluştadaki Hizb ut-Tahrir gruppasınıñ» mabüsleri Ruslan Nagayev, Eldar Kantimirov, Ruslan Mesutov ve Lenur Halilovnıñ ükmüni çıqardı. Erkekler terror faaliyetinde qabaatlanıp, 13, 12 ve 18 yıl sert rejimli koloniyada qalmasına üküm etildi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
