Rusiye tarafından 13 yılğa üküm etilgen «qırımlı musulmanlar davasınıñ» mabüsi Ruslan Nagayev Rusiye apishanesinde kerekli tibbiy yardım alamay. Bu aqta «Qırım birdemligi» cemaat birleşmesi advokatı Yevgeniy Goroşkonıñ malümatına esaslanıp bildire.
Onıñ aytqanına köre, qırımlı tibbiy yardım istedi, amma ricalarına emiyet berilmedi.
«Ekim apishanege keldi, amma Nagayevni qabul etmedi», – dep qoştı Goroşko.
Nagayevniñ ömür arqadaşı «Qırım birdemligine» bildirgenine köre, aqayınıñ yüksek qan basımı bar, büyrekleri ağıra ve apishanede tedaviylenmey.
Al-azırda Nagayev Rusiyeniñ Çelâbinsk vilâyetindeki Verhneuralsk apishanesinde tutula. Cezalarnı yerine ketirüv federal hızmeti vaziyetni izaatlamay.
2019 senesi iyünniñ 10-nda Aluşta, Qarasuvbazar ve Aqmescit rayonlarında qırımtatarlarnıñ evlerinde keçirilgen tintüvlerden soñ sekiz kişi tutuldı: Ruslan Nagayev, Eldar Kantemirov, Ruslan Mesutov, Lenur Halilov, Riza Ömerov, Enver Ömerov, Ayder Cepparov ve Eskender Suleymanov.
Rusiye akimiyeti Nagayev ve Umerovnı Rusiyede terroristik tanılğan, amma bir çoq memlekette milliy qanunlar seviyesinde sıñırsız faaliyet köstergen «Hizb ut-Tahrir» islâm siyasiy firqasınen alâqaları bar dep qabaatladı.
2021 senesi avgustnıñ 16-nda Cenübiy okrugınıñ arbiy mahkemesi «Aluştadaki Hizb ut-Tahrir gruppasınıñ» mabüsleri Ruslan Nagayev, Eldar Kantimirov, Ruslan Mesutov ve Lenur Halilovnıñ ükmüni çıqardı. Erkekler terror faaliyetinde qabaatlanıp, 13, 12 ve 18 yıl sert rejimli koloniyada qalmasına üküm etildi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
