Qırımda Rusiye mahkemesi tarafından «qanunsız silâlı birleşmede» iştirak etkeninde qabaatlanıp, 5 yıl koloniyada qalmasına üküm etilgen Herson vilâyeti Azovske köyüniñ sakini Ruslan Abdurahmanov Ukrayına akimiyetinden onı deñişmege rica ete. Bu aqta «Qırım aq qorçalayıcı gruppası» Abdurahmanovnıñ mektübine esaslanıp bildire.
Abdurahmanov yazğanına köre, 2022 senesi aprel ayında tutulğanından berli Aqmescitteki №2 SİZOnıñ (Elevatornıy çaprazı, 4) 61-inci kamerasında tutula. Mahkümniñ aytqanına köre, sağlığı pek fenalaştı, tibbiy yardım ise kösterilmey.
«Ukrayınanıñ salâhiyetli organlarına meni Aqmescitniñ №2 SİZOsında qanunsız tutalar, dep tasdıqlayım. Meni deñişmek ve azatlıqtan qanunsız marum etüv yerlerinden azat etmek içün bütün imkânlarnı qullanmağa rica etem», – dep yazdı Ruslan Abdurahmanov.
O, Ukrayına prezidenti, Ukrayına Yuqarı Radasınıñ deputatları, ombudsmen ve diger vekâletli şahıslarğa muracaat ete.
Aq qorçalayıcılar bildirgenine köre, 2022 senesi dekabr ayında Abdurahmanov bir mektüp berdi. Anda Azovske köyünden nasıl hırsızlandı, Geniçeskte №17 PTU-da işkencege oğratılıp sorğuğa çekildi, Aqmescitke zorlap alıp ketirildi, basqı, telüke ve qorantası içün qasevetlengeni içün Abdurahmanov özüne iftira attı, dep yaza.
Aq qorçalayıcılar 2022 senesi baarde Rusiye gvardiyasınıñ arbiyleri Herson vilâyeti Geniçesk rayonınıñ Azovske köyünde tintüvler keçirdi, dep hatırlattı. Olar Azovske köyüniñ sakini Ruslan Abdurahmanovnı tutıp, Qırımğa alıp ketti.
İlk malümatqa köre, onı «Asker» vatandaş birleşmesinde ve Qırım qamaçavında iştirak etkeninde qabaatlap, Aqmescit SİZOsında tutqanlar.
2022 senesi sentâbrniñ 2-nde Rusiye kontrolindeki Aqmescitniñ Kiyev rayon mahkemesi Abdurahmanovnı beş yıl sert rejimli koloniyada qalmasına üküm etti. 2022 senesi dekabr ayında Ruslan Abdurahmanov Aqmescit SİZOsında yaramay şaraitlerde qala edi. Kamerada daa dört kişi bar edi: episine kün devamında töşekke oturmağa yasaqlanğan edi. Kamerada er kün tintüvler keçirile edi.
Hatırlatamız, 2022 senesi sentâbrniñ 2-nde Aqmescitteki Rusiye mahkemesi qırımtatarı Aydur Umerovnı 5 yıl sert rejimli koloniyada qalmasına üküm etti. Ukrayına aq qorçalayıcılarınıñ malümatına köre, Rusiye arbiyleri onı işğal etilgen Herson vilâyetinde hırsızladı.
2022 senesi oktâbrniñ 17-nde belli olğanına köre, Qırımdaki Rusiye mahkemesi qırımtatarı Artur Memetşayevni 6,5 yılğa azatlıqtan marum etti. İşğal etilgen Geniçeskte hırsızlanğanı aqqında «Qırımtatar resurs merkezi» bildirgen edi.
Rusiye kontrolindeki Aqmescitniñ Kiyev rayon mahkemesi qırımtatarı, Herson vilâyetinden taksici Rustem Gugurikni Rusiyede yasaqlanğan «Noman Çelebicihan qırımtatar batalyonında» iştirak etkeninde qabaatlap, 8,5 yıl sert rejimli koloniyada qalmasına üküm etti.
Hatırlatamız, 2022 senesi dekabr ayında Rusiye kontrolindeki Canköy rayon mahkemesi «Noman Çelebicihan batalyonında» qabaatlanğan Ukrayına vatandaşını 4 yıl ve 3 ay sert rejimli koloniyada qalmasına üküm etti.
Ukraina uquq qoruyıcı organları erkânında qırımtatar batalyonını quruv munaqaşası 2016 senesinden berli devam ete. Ukraina İç işler nazirligine ait Ukraina Milliy gvardiyası, olarnıñ qurulışında «qırımtatar batalyonınıñ» qurulması aqqında beyanatlar şimdilik qanun seviyesinde tasdıqlanmağan beyanatlar olıp qla, dep qayd etken edi. «Asker» cemaat teşkilâtınıñ yolbaşçısı Lenur İslâmov Noman Çelebicihan «qırımtatar batalyonına» arbiy bölük nomerasını bermege talap etken edi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
