"Noman Çelebicihan adına batalyon"da iştirak etkeni içün Rusiye mahkemesi tarafından 5 yıl apis sert apis cezasına mahküm etilgen Herson vilâyetiniñ 31 yaşındaki sakini Ruslan Abdurahmanov Rusiye quvetçileriniñ iskenceleri aqqında aytıp berdi. Onıñ mektübini "Qırım uquq qoruyıcı gruppası" yayınladı.
Mektüpte erkek evel haber etilgeni kibi mayısnıñ 22-nde degil, aprelniñ 18-nde qaçırılğanı aqqında yazıla. Abdurahmanovnıñ sözlerine köre şu künü "DNR" qanunsız silâlı teşkilâtınıñ işareti ve Rusiye bayraqları ile silâlı adamlar onıñ Herson vilâyetiniñ Azovskoye köyündeki evine basıp kirgen.
"Balalarımnıñ ve apayımnıñ közü ögünde meni urdılar, yıqıldım ve meni tepmege başladılar. Olar yedi adam edi. Soñra başıma qara çöp çuvalını çekip, skotçnen sarıp, çıqarıp maşnağa qoydılr. Başta Geniçeskteki PTU №17 ketirdiler", - dep yazdı o.
Onıñ sözlerine köre, başqa tutulğan kişiler de bu binada edi ve olar da iskencelerge oğratıla edi.
"Meni iskence kamerasına ketirdiler, mağazğa endirdiler. Qolum, közüm baylanğan şekilde bir köşege oturttılar. Anda ceset qoqusı edi. Soñra üç kişi keldi, laflarından çeçenler olğanını añladım. Meni tabanğa yatqızdılar, pıçaqlarını çıqarım, cinsiy müçeleremini kesmeknen tehdit ettiler. Soñra elektrik aqımınen qıynadılar, köteklediler. Aileme de aynısını yapacaqlarını ayttılar. Soñra olarnıñ büyügi keldi, anda birisi artıq ölgenini ve onı barıp kömmek kerek olğanını ayttı", - dep yazdı o.
Şu künü aqşam Abdurahmanovnı "Çonğar" kiriş-çıqış yoqlav keçitine alıp ketkenler. Soğru keçirgen insanlar Rusiye FSB hadimleri olğanını aytqanlar.
2022 senesi baarde Rusiye quvetçileri Herson vilâyetiniñ Azovskoye köyünde tintüv keçirgen edi. O zaman Ruslan Abdurahmanov yaqalandı. Sentâbrniñ 2-nde RF mahkemesi onı 5 yıl sert apis cezasına mahküm etti.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
