Ukrayına Silâlı quvetleriniñ Ava quvetleriniñ komandanlığı bildirgenine köre, noyabrniñ 14-ne keçer gecesi Rusiye Federatsiyasınıñ ordusı Ukrayınağa darbe dronları, ballistik ve idare etilgen aviatsion raketanen ücüm etti.
«Primorsko-Ahtarsk (Rusiyeniñ Krasnodar ülkesi) rayonından 9 darbe Shahed-136/131 çıqtı. Canköyden (Qırım) uçurılğan «İskander-M» ballistik raketası, vaqtınca işğal etilgen Zaporijjâ vilâyetinden X-35 aviatsion raketası çıqtı. Ukrayına Ava quvetleri Ukrayına Mudafaa quvetleriniñ ava mudafaa küçlerinen beraber 7 Shahed-136/131 uçucısızını yoq etti», – dep aytıla haberde.
Regionlardaki malümat alına.
Ukrayına Silâlı quvetleriniñ malümatına köre, keçken künü Rusiye ordusı umumen 4 raketa ve 53 aviatsiya darbesini kerçekleştirdi, toplu ateş reaktiv sistemalarından 45 ücüm yaptı.
Rusiye arbiyleri, top, toplu ateş raket sistemaları, dron ve raketalarnı qullanıp, Ukrayina şeerlerine muntazam sürette ateş aça. Delil ve şaatlıqlarğa baqmadan, Moskva Ukrayinada vatandaşlarğa qarşı ücüm yapqanını inkâr ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
