Rusiyeniñ Yuqarı mahkemesi "diversiya azırlağanında, qanunsız silâlı birleşmeni qurğanında ve Rusiye topraq bütünligini bozmağa çağırğanında qabaatlanıp" ğıyabiy şekilde mahküm etilgen ATR telekanalınıñ baş müdiri Lenur İslâmovnıñ ükmüni deñiştirmedi. Bunı Facebookta advokat Nikolay Polozov haber etti.
Polozov Avropa insan aqları mahkemesine şikâyet ile muracaat etmege niyetindedir.
"Bu işte AİAM-ne muracaat etmek içün artıq iç bir protsesstsal mania yoq. Temyiz mahkemesiniñ qararı alınğan soñ munasip şikâyet AİAM yollanacaq", - dep yazdı advokat.
2020 senesi dekabrniñ 10-nda Qırım Yuqarı mahkemesi İslâmovnı 19 yıl sert rejimli koloniyada qalmasına ğıyabiy şekilde üküm etti. O, qabaatlavnıñ bütün noqtalarına istinaden qabaatlı tanıldı – «diversiyalarnı teşkil etüv, qanunsız silâlı birleşmeni quruv ve Rusiye topraq bütünliginiñ bozuluvına çağıruv». Qadılar, ükümde İslâmovnıñ kütleviy haber vastalarınıñ faaliyetinde 2 yıl iştirak etmesini yasaqladı ve 1 yılğa azatlığını sıñırladı.
İslâmovnıñ Qırım.Aqiqatqa bildirgenine köre, o, Avropa insan aqları mahkemesine muracaat etecek.
2021 senesi aprel ayında Soçideki Üçünci umumiy yurisdiktsiya istinaf mahkemesi ATR telekanalınıñ baş müdiri Lenur İslâmovnıñ ükmüni 19 yıldan 18 yılğa deñiştirdi.
Rusiye FSBsi 2015 senesi oktâbr ayında Lenur İslâmovğa qarşı cinaiy dava açıp, onı federal qıdıruvğa ilân etti.
