Oktâbrniñ 16-na keçer gecesi Rusiyeniñ Volgograd vilâyeti uçucısızlarnıñ «kütleviy ücümine» oğradı, olarnıñ nişanı energetik infrastruktura obyektleri oldı, dep bildirdi Rusiye akimiyeti. Bir ast stantsiya yanıp başladı, bir qaç mesken yer ışıqsız qaldı, dep bildire Kavkaz.Realii.
Rusiye regionınıñ valisi Andrey Boçarovnıñ bildirgenine köre, Nikolayev rayonındaki Balaşov elektrik hatlarıda urulğan dron tüşken soñ yanğın çıqtı. O, elektriksiz qalğan evlerniñ sayısını bildirmedi. Adiseniñ başqa tafsilâtları şimdilik yoq – okrugda ücümlerniñ aqibetlerini derc etmege yasaqlandı.
Berilgen malümatqa köre, yanğın söndürile, yaralanğanlar ve diger yıqıntılar yoq. Umumen gece vilâyette 11 uçucısız urıp tüşürildi, dep esabat berdi Rusiye Federatsiyasınıñ Mudafaa nazirligi.
Qara ve Azaq deñizlerinde birer uçucısız qayd etildi, Tuapsede insansız katerlerniñ ücüm telükesi rejimi bar – yerli sakinlerden yalığa çıqmamağa rica eteler.
Daa sekiz dron Rusiyeniñ Rostov vilâyetinde urıp tüşürildi – anda aqibetler olmadı, dep bildire vali Yuriy Slüsar.
Aynı vaqıtta Rusiye ordusı Ukrayinadaki energetika obyektlerine darbe endirdi. Poltava, Sumı, Dnipropetrovsk ve Kırovoğrad vilâyetlerinde gaz çıqarıluvı toqtatıldı, dep yaza UNIAN. Çerniğiv ve Nejinde Rusiye ücümi neticesinde üç kişi yaralandı, mesken ev ve bir qaç maşina yandı, dep haber ete Azatlıq Radiosı.
Oktâbrniñ 15-ne keçer gecesi Ukrayina uçucısızları Rusiyeniñ Rostov ve Volgograd vilâyetlerine ücüm etti. Volgograd vilâyetinde mustaqil evler zarar kördi, yaralanğanlar yoq, dep bildire akimiyet.
Dağıstan sakinlerine köpür, ava mudafaa sistemaları ve Ukrayina uçucısızlarınıñ darbe aqibetlerinen fotoresimlerni internette derc etmege yasaqlandı. Yılnıñ başında böyle yasaqlar uçucısızlarnıñ ücümlerine oğrağan Rusiyeniñ cenübiy regionlarında kirsetilip başlandı. Şimdi yañı qaideler bütün okrugda bar.
