Türkiye prezidenti Recep Tayyip Erdoğan Rusiye Federatsiyasınıñ Ukrayinağa qarşı cenkinde deñizde ve avada barışıq ğayesine qoltuttı.
«Taraflar arasında işanç pekitecek tedbir olaraq ateş ve ücümni tez toqtatuv rejimi ğayesine qoltutamız», – dep ayttı Erdoğan AB teşkil etken online körüşüvde.
Onıñ beyanatı Ukrayina prezidenti Volodımır Zelenskıy kerçek barışıqnı tiklevde ilk adımlar Rusiyeni raketa ve dron ücümleriniñ toqtatıluvına mecbur etmek olmalı dep aytqan soñ oldı.
«Bunı kontrol etmek mümkün. Kökte sessizlik – raketa, uzun mesafeli dronlar ve ava bombalarınıñ qullanuv yasağı. Deñizde sessizlik – normal gemi areketleriniñ kerçek kefaleti. Ukrayina barışıqqa ketmege azır, ve bu cenkniñ ilk saniyelerinden Ukrayina barışıq istey. Vazife – Rusiyeni cenkni toqtatmağa mecbur etmektir», – dep qayd etti Zelenskıy.
Bu Rusiyeniñ Ukrayinağa, hususan energetika ve gaz infrastrukturasına qarşı kütleviy ücüminden soñ oldı.
Fevral ayında Bloomberg agentligi menbalarına esaslanıp, NATOda ABDden soñ eñ büyük ordusı olğan Türkiye Ukrayinada barışçı quvetlerge ordu berüv içün açıq, dep bildirgen edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
