Rusiyeniñ Ukrainağa qarşı silâlı ücümi vaqtında martnıñ 15-i sabasına qadar 97 bala vefat etti ve 100-den çoq yaralandı. Bu aqta Ukraina Baş prokurorı ofisi bildirdi.
«Eñ çoq Kyiv, Harkiv, Donetsk, Çerniğiv, Sumı, Herson, Mıkolayıv ve Jıtomır vilâyetlerinde zarar körgenler. Er kün eñ az beş bala ateş altında öle», – dep aytıla Baş prokurornıñ ofisi haberinde.
Berilgen malümatqa köre, bombardıman ve ateş neticesinde 400-den çoq oquv yurtu zarar kördi, 59-ı tamamen viran etildi. 11 tibbiy müessise, 3 reabilitatsiya merkezi, şu cümleden saqatlığı olğan balalar içün merkezlerge ateş açıldı.
Müessise, bu raqamlar doğru degil, çünki adise yerlerini baqmağa imkân yoq, dep qayd etti. Tecavuzcı memleket vaqtınca işğal etilgen topraqlarda da faal cenk areketlerini keçire.
Bu malümatnı tasdıqlaycaq diger resmiy menbalar şimdilik yoq.
Ukrainağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Mesken rayonlarğa top, çoqlu ateş sistemaları ve ballistik raketalar vastasınen ateş açıla. Rusiye ordusınıñ zırhlı tehnikası Kyiv ve Rusiye sıñırına yaqın bir qaç vilâyet merkezini sarıp almağa tırışa.
Rusiye Ukrainağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: rukrymr.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
