Çarşanbe gecesi Rusiye Federatsiyasınıñ Krasnodar vilâyetine dronlar ücüm etti. Nişan, şaatlarnıñ aytqanlarına köre, Tuapse şeerindeki deñiz limanı edi.
Rusiye akimiyeti Ukrayina Silâlı Quvetleriniñ dronları vatandaş obyektlerine ücüm etti, dep ilân etti. Vali Veniamin Kondratyev Tuapse ve Temrük rayonında mustaqil evler zarar kördi, amma yaralanğanlar yoq, dep bildirdi.
Şeer sakinleri Tuapse deñiz limanına devamlı ücüm aqqında haber etip, patlavlarnıñ videolarını derc eteler. Videolardan birinde zarar körgen mesken bina kösterile.
Rusiye Telegram kanalları Anapada patlavlar aqqında bildire, anda ava mudafaa sisteması çalışqandır. Soçi ava limanında «Kovör» planı kirsetilgen, o, uçaqlarnı qabul etmey ve yollamay.
Uçucısız ücüminiñ ıntıluvı aqqında Qırımnıñ Rusiye akimiyeti bildirdi. Qara deñizde dört dron urıp tüşürildi.
Rusiye Mudafaa nazirligi Rusiye, Qırım, Qara ve Azaq deñizlerinde 128 uçucısıznıñ yoq etilüvini haber etti. 83 uçucısız Rusiyeniñ Krasnoadr ülkesinde urıp tüşürildi.
Rusiye tarafınıñ malümatını tasdıqlamaq ya da teşkermek imkânsız ola. Ukrayina tarafı ücüm aqqında malümatnı şimdilik izaatlamadı.
2022 senesinden başlap yarımada aman-aman er kün uçucısız ve raketalarnıñ ücümine oğray, çoqusı alda Rusiye Federatsiyasınıñ Mudafaa nazirligi ya da Rusiye akimiyeti, bu malümat olsa da, arbiy obyektlerge darbe endirilgenini tasdıqlamay.
Roskomnadzor Qırım.Aqiqat saytını blok etti.Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
