Rusiye Ukrayina prezidenti Volodımır Zelenskiy evelden aytqan Ukrayinanıñ Sumı ve Harkiv vilâyetlerine ücümini başladı. Bu aqta Ukrayina Silâlı quvetleriniñ Baş komandanı Oleksandr SırskıyLB.uasaytına bergen intervyüsında bildirdi.
Sırskıynıñ aytqanına köre, soñki künleri esas yönelişlerde Rusiye ordusınıñ ücüm areketleri aman-aman eki qat artqanını körmek mümkün.
Ukrayinada cenkleşken Rusiye arbiyleriniñ sayısı ep arta. Sırskıynıñ aytqanına köre, 2022 senesi fevral ayında Ukrayinağa ücüm başlağanından berli Rusiye bölükleriniñ sayısı beş qat arttı ve aprel başına qadar 620 biñ insandan ibaret edi.
Sırskıy bı yıl küzde Beyazrusiyede talimler azırlığına diqqat ayırıp, 2022 senesiniñ başında böyle talimler Beyazrusiyede fevral ayında Kyivge ücüm etken darbe bölüginiñ quruluvına sebep oldı, dep qayd etti.
Sırskıy New York Times maqalesinde 2023 senesi yazda Bahmut ücümi ğayesi sebebinden Ukrayinanıñ cenüpte qarşı ücümi bozuldı degen malümat doğru degil, dep bildirdi. Sırskıynıñ aytqanına köre, Bahmut ücüminde tek eki brigada iştirak etti, gazeta ise beş aqqında yazğan edi.
Sırskıy Ukrayina Silâlı quvetleriniñ bıltır avgustnıñ 6-nda Kursk vilâyetinde başlatılğan operatsiyanı büyük muvafaqiyet dep adlandırdı. Onıñ aytqanına köre, onı Rusiye komandanlışı beklemedi ve bu sayede Donetsk vilâyetinde cebeni tutmağa imkân oldı.
Ukrayina Silâlı quvetleriniñ Baş komandanı Ukrayina arbiyleriniñ «muvafaqiyetli areketleri» Rusiyeniñ Tu-22M3 uzaq mesafeli bombardımannıñ felâketine ketirgeni aqqında ayttı. O, yaqında İrkutsk vilâyetinde, cebeden biñlernen kilometr uzaqlıqta tüşti. Rusiye Mudafaa nazirligi tehnik bozuv aqqında haber etti.
Sırskıy qayd etkenine köre, soñki vaqıtları ABD tarafından yardım eksildi, esas silâ ise Avropa Birligi memleketlerinden kele. Aynı vaqıtta Ukrayina Silâlı quvetleriniñ Baş komandanı Ukrayina öz küçünen çoq şey yapqanını, onıñ arbiy sanayısı inkişaf etkenini qayd etti.
Ukrayina prezidenti Volodımır Zelenskıy evelden bildirgeni kibi, istihbarat malümatına köre, Rusiye arbiyleri Sumı, Harkiv ve Zaporijjâ vilâyetlerinde ücüm etmege azırlanalar. Soñki aftalarda Sumı vilâyetiniñ sıñır yerlerinde uruşlar olğanı aqqında haberler keldi. Aynı vaqıtta, Ukrayina askerleri mart ayında Suca regional merkezinden çekilmege mecbur olsalar da, Rusiyeniñ Kursk vilâyetindeki küçük topraqlarnı tutmağa devam eteler. Zelenskıy Rusiyeniñ Belgorod vilâyetinde Ukrayina arbiyleri bulunğanını da tasdıqladı. Monitoring resurslarına köre, sıñır yerlerinde arbiy areketler keçe, eki sıñır köyü içün cenk kete.
Ukrayina reberliginiñ fikirince, Rusiye Moskva ve Kyivge barışıq añlaşmasını tizmege teklif etken ABDni uzun ve neticesiz muzakerelerge celp etmege tırışa, böylece ücüm areketlerini inkişaf ettirip, daa çoq Ukrayina toprağını almağa istey.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
