Rusiye quvetçileri, tintüv vaqtında onda Noman Çelebicihan adına qırımtatar göñülli batalyonınıñ bayraqları tapılğanını iddia ete ediler. Ertesi künü Virasti azat etildi, amma soñra kene tutuldı.
"Rustem Virastini eki yıl devamında esirlikte tuta ediler, anda sağlığı ket-kete fenalaşa edi, aqları ise daima bozula edi. Neticede bu onıñ ölümine ketirdi", — dep aytıla QRM-niñ beyanatında.
Qırımtatar resurs merkezi ukrayin akimiyetini siyasiy mabüslerni azat etmek içün çetel ve halqara teşkilâtlarnı celp etip, ğayretlerni quvetleştirmege çağırdı.
Qırımtatar Milliy Meclisiniñ reisi Refat Çubarov bildirdi ki, şimdi Virastiniñ tuvğanları onıñ cesedini alıp, Herson vilâyetiniñ Geniçesk rayonınıñ Rıkov qasabasına, o apiske alınmazdan evel yaşağan yerge, defin etmek içün ketirmege tırışalar.
Daa evel QRM haber etkenine köre, 2014 senesinden başlap, "Noman Çelebicihan" qırımtatar batalyonında iştirak etkeninde qabaatlanıp, eñ azından 51 insan yaqalandı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
