ATR qırımtatar telekanalınıñ ofisi Kıyivge endirilgen raketa ücüminde zarar kördi. Bu aqta telekanalnıñ içtimaiy ağlarında aytıla.
Darbe dalğasından binanıñ pencereleri yıqıldı, studiya, haberler odası, grimörka, apparat odası ve telekanalnıñ baş muarririniñ odasıba büyük zarar ketirildi.
Telekanalnıñ baş müdir muavini Ayder Mujdabayevniñ aytqanına köre, ofislerde adiy rejimde çalışmaq şimdilik imkânsız. Şimdi taqım zararnı esaplay, serverler ve tehnikanıñ vaziyeti belli degil.
Kanal hadimlerinden kimse zarar körmedi.
ATR — 2006 senesi sentâbr ayında yayınlavını başlağan ukrayin qırımtatar telekanalıdır.
Rusiye ordusı fevralniñ 12-nde saba Kıyivge ballistik raketalarınen ücüm etti, bundan evel ise Ukrayina üzerinde "Şahed" tipindeki ücüm uçaqları ve imitatorlarnı uçurdı, dep bildire Ukrayina Ava quvetleriniñ komandanlığı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
